Ang multi-level marketing company nga ‘Frontrow’ opisyal nga nibukas sa ilang buhatan sa Cebu nga nahimutang Capitol Square, dalan Escario, Cebu City, niadtong Nobiyembre 19, 2022.

Ang Frontrow inila nga distributor sa anti-ageing, vitamins, immune booster, slimming ug cosmetic products.

Kuyog sa CEO sa maong kompaniya ug Tutok To Win Partylist Representative Sam Verzosa ang iyang maanyag nga celebrity girlfriend nga si Rhian Ramos atol sa grand opening.

Di ikalimod sa showbiz world nga hinigugma sa kongresista ang Kapuso aktres nga game kaayo nga nilingaw ug nasud-ong sa gatusan ka mga miyembro nga mitambong sa atol sa maong kalihokan.

Matod pa ni Rhian nga human sa maong event,nisaad kaniya si Sam nga mosuroy sa mga lugar sa Cebu ug ang gikahinaman sa aktres nga makatilaw pag-usab og lechon de Cebu.

Si Sam, sa iyang bahin, nagkanayon nga sa pagbukas sa ilang bag-ong sangang buhatan sa Cebu, magpadayon ang ilang pagtunol og abag ngadto sa mga Sugboanon nga mamahimong entrepreneurs ug mapalambo ang ilang ‘financial lives.’