Interesado ang Metro Pacific Tollways Corporation (MPTC) nga mosalmot sa public bidding sa multi-billion Metro Cebu Expressway (MCXE) nga magdugtong sa City of Naga sa habagatang bahin sa Sugbo ngadto sa Danao City sa amihanan.
Kini ang gikompirmar ni Allan Alfon, presidente ug general manager sa Cebu-Cordova Link Expressway Corporation (CCLEC), ang kompaniya nga nagdumala sa Cebu-Cordova Link Expressway nga nagdugtong sa Cebu City ngadto sa lungsod sa Cordova sa Mactan Island.
Ang CCLEC usa ka subsidiary nga kompaniya sa MPTC, nga gipanag-iya sa negosyanteng si Manuel Pangilinan.
“Kini (ang proyekto) gipresentar kanamo mga tuig na ang milabay ug kami miingon nga kami interesado sa bidding tungod kay kini subject sa bidding tungod kay kini ubos sa solicited proposal,” matud ni Alfon sa kombinasyon sa Cebuano ug English.
Matod niya nga ang Department of Public Works and Highways (DPWH) maoy nipresentar sa proyekto ngadto kanila ug sa ubang pribadong contractor groups.
“Sa akong hunahuna ang bidding sa publiko ibase sa labing ubos nga toll nga imong matanyag,” ingon ni Alfon.
Ang pagtukod sa Metro Cebu Expressway, nga magsilbi nga alternatibo nga north-south highway nga gipaabot nga mapadali ang biyahe, gisugdan lima ka mga tuig na ang milabay.
Sa pagkakaron, kapin na sa lima ka kilometro sa 71-kilometros nga expressway ang nahuman.
Ang DPWH namahayag sayo pa nga kon ang kagamhanan ang mogasto maabtan pa kini og mga 25 ka tuig una mahuman tungod sa kakuwang sa pundo.
Ang labing maayo mao ang pagpatuman sa proyekto nga pribado ang pahimuon. /