Unom ka mga tawo nasikop sa managlahing mga operasyon batok sa ilegal nga sugal o ilegal nga swertres sa kalungsuran sa Probinsiya sa Sugbo sa Nobiyembre.

Ang mga suspek giilang mao sila si Reynaldo Villasurda, 57; Lowela Campaña, 41, pulos mga lumolupyo sa Barangay Balungag, lungsod sa San Fernando; Timoteo Baruman, 46, taga Barangay Cabatbatan sa Lungsod sa San Fernando.

Laing mga suspek mao sila si Rubbie Mae Aisha Roflo, 37; Ritchel Roflo, 39; ug Ljobomer Talines, 43, pulos taga Barangay Pio, Tabogon amihanang Sugbo.

Sila si Villasula, Campaña Baruman, ug manag-agaw nga Roflo pulos mga usher samtang si Talines nitaya sa usa ka ilegal nga nagpadagan sa dulang swertres.

Nasakmit sa kapulisan sa San Fernando ug Tabogon ang mga gamit sa ilegal nga sugal nga swertres nga walay pagtugot gikan sa Philippine Charity Sweepstakes Office (PCSO) ug kwarta nga gituohang kita sa ilegal nga sugal nga mokantidad og P1,000.

Una nang nipahibalo si Police Brigadier General Roderick Agustus Alba, direktor sa Police Regional Office (PRO) 7, nga lakip sa ilang gitutokan ang ilegal nga sugal sa Central Visayas.

Kanunay nagpahimangno ang buhatan sa PCSO sa Probinsiya sa Sugbo nga ang Saturn Gaming n’ Amusement Corp. bugtong gitagaan og pagtugot sa ilang opisina nga mopahigayon sa maong paduwa.

Ang mga nadakpan pasakaan og tukmang kaso sa ilegal nga sugal.