Ang Kawasan Falls sa lungsod sa Badian nalakip sa listahan sa labing nindot nga falls sa tibuok kalibutan, sumala ni London-based travel blogger Amanda O’Brien o nailang Boutique Adventurer.

Ang Kawasan Falls sa Barangay Matutinao, 130 kilometros habagatan sa siyudad sa Sugbo, daghang mobisita tungod sa iyang mabugnaw ug maanindot nga 130-feet multi-layered waterfalls.

Si Marty Ybañez, pangulo sa Cebu Provincial Tourism Office (CPTO), nagkanayon nga angay nga ipasigarbo ang maong talan-awon ug nisaad nga mopadayon sa pagpalambo ug pagmintinar sa maong dapit.

Sa kasamtangan, nagpabilin pa nga sirado ang maong tourist destination human sa kadaot nga naangkon niini atol sa pag-igo sa bagyong Odette sa Disyembre 2021.

Dugang ni Ybañez nga padayon usab nga gihan-ay ang tindahan og mga pagkaon ug uban pang produkto.

“Mao na before ‘cause nag-clean-up ta sa mga debris and katong structure na tulo kabuok sa kilid jud sa falls na area atong gipa vacate and giguba jud ang building nya nag create ta po og area where adto ra pwede makatinda og foods and now ang pavement going in ato sad gitrabaho,” matud niya.

Gipahibalo ni Earl Vincent Endab, pangulo sa Municipal Tourism Office sa Badian, nga padayon pa ang pag-ayo sa pathway aron sa mas dali nga pag-agi sa mga turista sa lugar.

Nanghinaot usab siya sa maayong panahon sa mosunod nga mga adlaw aron mapaspasan ang pagtrabaho niini gumikan sa pagkalangay tungod sa nasinating mga pag-uwan.

“Magdepende man gud sa weather ang construction sa pathway..” dugang ni Endab.

Gidugang ni Endab nga bisan og nalangay ang pagbukas sa nabantog nga tourist site, mas angay atangan sa mga turista ug bisita ang hingpit unya nga pagbukas niini ilabi na sa gihimong mga kalamboan sa lugar.

“With the natural modification by Typhoon Odette last year, we will be expecting a new landscape and attractions..” dugang ni Endab.

Gawas sa Kawasan, laing falls usab ang gilantaw nga palambuon sa lungsod nga mao ang Basak Falls.

Sa wala pa niigo ang pandemiya ug gisundan sa trahedya sa bagyo, anaa sa P45 ang environmental fee sa Kawasan.

Laing P200 usab nga guide fee alang na sa pito ka mga tawo ug ang life vest nga tag P50 ang abang.

Gawas sa falls sa probinsya, gitanyag usab nga labing nindot nga kasuroyan ang kadagatan sa lalawigan sa Sugbo.