Patay ang usa ka 15 anyos nga lalaki human iyang gisakyang motorsiklo nagkabangga sa gikasugat nga motorsiklo, alas 6:09 sa gabii sa Miyerkules, Nobiyembre 23, 2022, sa national highway sa Brgy. Tulic, lungsod sa Argao.

Ang duha ka mga motorsiklo nangatumba ug nalagpot ang mga drayber.

Gumikan sa grabeng kadaot, ang 15 anyos nga si Arveen John Villacorte Cayanan, taga Sitio Banlot, Brgy. Usmad, Argao, patay nang niabot sa tambalanan sa lungsod.

Samtang, nalandig usab sa tambalanan si Eulieboy Carillo, hingkod, taga Alambijud, Argao, drayber sa laing motorsiklo.

Si Police Staff Sgt. John Mark Canonego sa Argao Police Station nga nahinabi sa Superbalita Cebu, nagkanayon nga ang 15 anyos sakay sa Honda nga motorsiklo paingon sa norte ug gikasugat niya ang laing motorsiklo nga gimaniho ni Carillo nga giingong kusog nakapadagan.

Apan sa pag-abot sa nahisgutang lugar, matud ni Canonego, si Carillo nilikay sa libaong sa dalan apan natayming nga dunay gikasugat hinungdan sa head on collision sa duha ka mga motorsiklo.

Si Carillo pabiling giatiman sa mga doktor sa ospital sa Argao atol ning pagsuwat.

CEBU CITY

Duha ang nangaangol sa bangga sa motorsiklo sa dalan sa Happy Valley, Barangay Labangon, Siyudad sa Sugbo, alas 12:15 sa kaadlawon, Miyerkules, Nobiyembre 23, 2022.

Si Police Staff Sergeant Stephen Sefuesta sa Labangon Police Station, imbestigador sa aksidente, niila sa nangaangol nga sila si Leonel Joren Ermetanio, 24, ug Chanly Bayron Zabat, 28, pulos taga Sityo Kalubihan, Barangay Guadalupe, dakbayan sa Sugbo.

Giasoy ni Sefuesta nga usa ka Toyota Fortuner nga gimaneho ni Chris Kyle Dumdum Vercide, 28, taga dan Katipunan, Barangay Labangon ning siyudad, dunay nagsunod nga laing sakyanan ug nagsunod usab niini si Zabat sa laing direksiyon.

Matud ni Sefuesta, si Zabat ni-overtake sa gisundan nga sakyanan apan naapiki ug didto niigo sa nag-una nga SUV ni Vercide, nalabay sa pikas lane diin nagsubay ang motorsiklo ni Ermetanio sa opposite nga direksiyon hinungdan nga nagkabangga ang duha.

Sila si Ermetanio ug Zabat daling gidala sa tambalanan ug luwas na hinuon ang ilang kahimtang.

Ang kapulisan naghimo pa og dugang imbestigasyon sa pagsuta kon kinsa ang sad-an ug mapasakaan og kaso.