Gipaubos na sa state of calamity ang Barangay Looc, dakbayan sa Mandaue nunot sa sunog nga niigo sa kapin 600 ka pamilya.

Si Looc Barangay Captain Allan Siazon nitug-an sa mga tigbalita niadtong Huwebes nga ang emergency fund sa barangay magamit na sa pagpalit og mga butang alang sa mga nasunogan.

Gitataw ni Siazon nga ang mga pagkaon ug mga butang nga gihatag sa City Social Welfare and Services (CSWS) molungtad lang og tulo ka adlaw o hangtod sa Biyernes, Nobiyembre 25.

Ang punong barangay niingon nga ang Sityo Paradise maoy labing dako sa 15 ka mga sitio.

“Nagpasalamat ko nga walay nakalas,” matud niya gikan sa 250 ka mga balay nga naugdaw sa sunog.

Sa Huwebes sa buntag, Nobiyembre 24, 2022, ang CSWS nitaho nga niabot na sa 669 ka mga pamilya o 2,737 ka mga indibidwal ang gikatahong apektado sa sunog.

Sa maong ihap, si Siazon niingon nga 181 ka mga pamilya ang temporaryong gipapuyo sa barangay gym ug Cesar Cabahug Elementary School samtang 488 usab ka mga pamilya ang temporaryong gipapuyo sa Mandaue City Central School.

Matod ni Siazon nga nagplano sila nga ibalhin silang tanan sa Norkis Park imbes nga ibutang sa Cesar Cabahug Elementary School sa Barangay Looc. /