Moabot sa 30 ka mga “tikasan” nga timbangan ug tulo ka mga de kolor nga suga ang gipangsakmit sa tagdumala sa merkado publiko sa Barangay Tabunok, Dakbayan sa Talisay.
Ang pangulo sa merkado sa Tabunok nibutyag nga kini ilang naimbargo atol sa gihimong surprise inspection sa mga tindera nga namaligya sa Tabunok Public Market.
Si Engineer Arnie Dela Torre, nagdumala sa Tabunok Public Market, nibutyag nga atol sa ilang pag-inspeksiyon nasuta nga ang naimbargo nga mga timbangan wala ma-calibrate samtang way laing suga nga pagagamiton sa merkado publiko kadtong suga lang nga puti.
Matud ni Dela Torre, ang de kolor nga suga usa sa mga pamaagi sa tindera nga manindot tan-awon ang mga isda bisan di na presko.
Subay sa balaud, ang nakalapas niini momulta og P200 hangtod na sa P500.
“Mura lang mi intawon mi og iring ug ilaga ani nga magsige og paniid nila, ug masakpan sakit na gyud na nga kantidad alang kanila,” matud ni Dela Torre.
Usa sa mga awhag sa opisyal ngadto sa mga manindahay sa merkado nga kon dili sila mosunod sa gipatuman nga balaud, kanunay silang maimbargohan ug dili na mosalig kanila ang ilang mga kustomer.