Ang inila nga Masskara Festival sa Bacolod City, Negros Occidental nahibalik na human sa duha ka tuig nga pagkaputol resulta sa pandemiya.

Ang maong festival ipahigayon sa ika-upat nga Dominggo sa matag buwan sa Oktubre. Ning tuiga, niadtong Oktubre 23.

Ang tema karong tuiga mao ang “Balik Yuhum” nga maoy termino sa Hiligaynon nga a “smile again.”

Naila ang Bacolod nga “City of Smiles” tungod sa mapahiyumon nga mga maskara nga gisul-ob sa MassKara - usa ka mabulukon nga festival sa sayaw, musika, linutoan, turismo, ug kinabuhi sa maong dapit.

Gawas sa Masskara Festival, ang Bacolod City naila usab sa ilang mga lamiang delicacies ug maanindot nga mga tourist spot. Aniay pipila ka mga lugar ug mga lamiang pagkaon nga imong maadto ug masulayan kon ikaw masuroy sa Bacolod.

TOURIST SITES

San Sebastian Cathedral, Bacolod City

Ang simbahang Katoliko sa Bacolod City, nahimutang atubangan sa Public Plaza. Ang orihinal nga estraktura ginama sa coral stones gikan sa Guimaras ug hardwood gikan sa Palawan.

Negros Museum, Bacolod City

Ang Negros Museum nga anaa sa Provincial Capitol Complex, samtang ang edipisyo niini ang kanhi Provincial Agricultural Building natukod niadtong 1925.

Provincial Capitol ug Lagoon

Ang sentro sa Kagamhanang Probinsiyal sa Negros Occidental. Ang Romanesque neo-classical nga arkitektura nga disenyo. Panahon sa Ikaduhang Gubat sa Kalibotan kining dapita gigamit nga headquarters sa mga Hapon.

Mambukal Mountain Resort

Ang resort nga masinati ang mainit nga sulfur dipping pool nga giingon nga adunay kaayuhan sa panglawas. Mahimo usab nimo ang usa ka mubo nga trekking aron matagamtam ang pito ka mga busay niini.

DELICACIES

Bacolod Chicken Inasal


Dili kompleto ang pagbisita sa siyudad sa Bacolod kon dili sulayan ang sikat nga Chicken Inasal sa Manokan Country.

Cansi

Ang Cansi/Kansi mao kining talagsaon nga sabaw nga gisagolan sa maaslom nga prutas nga batwan uban sa karne ug bukog sa baka.

Ang Negros mao ang kapital sa asukal sa Pilipinas. Busa sa walay duha-duha gipasigarbo nila ang mga sweets. Ang laing paboritong lugar nga adtoan kon maghisgot kita bahin sa mga cake ug pastry mao ang Calea.

Sa imong pag uli, siguradoha gyud nga maka dala sa mga nagkalain-lainhg pasalubong sama sa Piyaya, Barquillos, Biscocho, Napoleones ug uban pa!

UNSAON PAG-ADTO?

Ang Bacolod-Silay International Airport nahimutang sa Silay City, 15 kilometros amihanan-sidlakan gikan sa Bacolod. Anaa sa usa ka oras nga biyahe sa eroplano kon manukad sa Manila, 30 minutos kon gikan sa Cebu.

Sa land-ferry-land, ang Bacolod City gibana-bana nga 4 ka oras ug 30 minutos gikan sa Cebu City agi sa Toledo-San Carlos City-Salvador Benedicto-Murcia nga rota, samtang moabat sa unom ka oras sa land-RORO-land agi sa susamang direksyon. /

MODAWAT OG CONTRIBUTOR

Sa mga “certified hinuroy” mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan. Higayon na nga mapatik dinhi sa pamantalaan ug sa Superbalita Cebu website ang inyong Suroy escapade.

Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. / EDITOR