Mga duwa karon: Nov 26, 2022
4:30 pm- Phoenix batok Terrafirma
6:45 pm- San Miguel batok TNT
Sa usa ka talagsaong senaryo, magtagbo ang title contenders nga San Miguel Beermen ug TNT Tropang Giga sa panagparang nga matawag og “fight for survival” sa main game karong gabii sa Philippine Basketball Association (PBA) Commissioner’s Cup sa Philsports Arena.
Ang Beermen naa sa arang-arang nga sitwasyon gumikan kay naa sila sa ikaunom nga puwesto dala ang 5-5 nga rekord.
Apan kon buot hunahunaon, delikado gihapon ang Beermen nga matagak kon mapilde ning kombatiha tungod sa kasikit sa standing.
Mas kuyaw ang kahimtang sa Tropang Giga tungod kay naa sila sa ika-10 nga dapit bitbit ang 4-7 nga rekord.
Bisan modaog pa ang Tropang Giga ning sangkaa, nga maoy katapusan nilang tahas sa eliminasyon, wala gihapon kaseguroan nga makasulod sa quarter-finals ug nagdepende pa ang tanan sa resulta sa ubang nahabiling mga duwa.
“We have to beat San Miguel and even then, di pa rin namin hawak ang fate namin,” matod ni coach Chot Reyes.
Nakabintaha sab ang Beermen ning sangkaa tungod kay kompleto na man ang ilang puwersa sa pagbalik nila ni JuneMar Fajardo ug Terrence Romeo kumpara sa Tropang Giga nga kuwangan og mga haligi.
Sa premirong duwa, magsangka ang Phoenix Super LPG Fuel Masters ug Terrafirma Dyip.
Ang Fuel Masters naa sa ikapitong dapit dala ang 5-6 nga rekord samtang ang Dyip, nga usa sa teams nga wala nay paglaom nga makaabante, nagbitay sa labing ubos dala ang 1-10 nga rekord.