Dunay sulti-sulti nga dugay modatu kon dili manglimbong. Siyempre, daling moburot ang bulsa sa negosyante nga kusog manikas sama sa presyo, kalidad sa ilang baligya, sukod o timbang.
Isip Kristiyano, Muslim o ubang relihiyusong sekta, nagtuo kita nga dunay Labawng Magbubuhat, dunay gaba nga moabot nga dili magsaba. Sagad moigo sa laing aspeto sa kinabuhi sa mga limbongan ug malapason.
Bisan sa yanong pagpangilad sa timbangan sa mga tindahan sa merkado, dili lang kini maisip nga kalapasan sa balaud sa tawo, apan sayop usab sa mata sa Magbubuhat.
Tinuod naglisod ang tanan, apan dili kini rason nga tikasan ang mamalitay nga nanaglisod nang daan sa pagbahinbahin sa ilang kita sa pagpalit og pagkaon ug ubang galastohan aron mabuhi.
Busa dalaygon ang gihimo sa tagdumala sa Tabunok Public Market sa dakbayan sa Talisay. Gisanta ang dugang pagpakasala sa gagmayng negosyante sulod sa merkado sa mga kabus.
Niadtong Huwebes, Nobiyembre 24, 2022, nikabat og 30 ka mga timbangan nga ‘gitikas ang sukod’ ug tulo ka mga delokor nga suga ang gipangsakmit atol sa ilang surprise inspection.
Si Engineer Arnie Dela Torre, pangulo sa naasoyng merkado, base sa balaud, ang suga nga puti ang bugtong gitugot sulod sa merkado publiko.
Dili kini diskohan, nganong dekolor ang suga?
Sumala ni Dedla Torre, ang nakalapas sa balaud sa merkado pagamultahan og dili mominus P200 hangtod sa P500.
Maayong buhaton usab kini sa tagdumala sa kamerkadohan labi na sa Carbon Public Market nga labing dako nga merkado sa dakbayan sa Sugbo.
Alang sa mga negosyante, mapasalamaton kini nga mibarog taliwala sa pandemiya sa Covid-19 ug epekto sa paghapak sa bagyong Odette sa Disyembre 16, 2021.
Grasya kini nga atong nadawat. Dili gamiton sa pagpahimulos sa uban aron dili bawion sa Kahitas-an. Pangandoy sa tanan nga maharuhay ang kinabuhi apan dili sa ingon nga pamaagi.