Way bisag usa nato ang dunay katungod manghusga sa uban labi na niadtong nagsakit ang gibati kay nagkabuwag o wa magkadayon.
Ang pulong nga ‘buwag’ sayon ra litukon labi na kon naa sa tumang kasakit o kasuko apan sa sulod sarang kining sakita bation. Samot kay ang uban daling maka yaga-yaga o basol nga sayop imong desisyon o ikaw hinuon ang pakasad-an nga gibiyaan kay di kahibalo moagwanta sa maluibong pares.
Lain-lain ta og paagi sa pag-move-on. Naay uban usa ka bulan ra makakita dayon og ipuli samtang ang uban tinuig unya dulot sa bukog ang kalagot.
Way perpektong formula para makasugakod sa kalisod, kasakit ug kauwaw apan diay akong mga personal nga suhistiyon nga makahatag og alibyo aron hinay-hinay makairog.
Ang pirmiro nakong gibuhat dihang gibiyaan ko ug akong mga anak sa akong kanhing bana mao ang pagdawat sa sitwasyon ug kamatuoran.
Human sa 6 ka buwan nakong non-stop og hinilak ug balikbalik nga pagpangutana ngano, nakaamgo ug nakadawat ko nga iya ming gipulihan kay naa siyay bag-ong bathala nga gikabuangan para sa iyang katagbawan ug temporaryong kalipay.
Sukad nako nadawat ang sitwasyon, hinayhinay na nakong natambalan akong nasamdang kasingkasing. Nadawat na nako sa dayon nga nga di siya para nako bisag 16 pa mi ka tuig nga magtiayon.
Niadtong panahuna, bisag napuno ko sa tsismis sa mga marites, padayon ang suporta, pagsabot ug paghigugma sa Labing Makagagahom, akong pamilya ug mga suod nga higala nga wa magdumili pagpaminaw ug duyog sa akong kasakit.
Para makairog, hinay hinay namo siyang gikalimtan. Akong gi-busy akong kaugalingon pag-atiman hinuon sa akong anak, mibalik og eskwela, midungag og trabaho aron makabayad sa tanan namong panginahanglan unya apil-apil og mga kalihukan sa simbahan ug katilingban.
Akong gibalik paghigugma akong kaugalingon sugod sa hitsura, postura ug pagka-ako hangtod mihinay-hinay og balik akong kalagsik , kalipay ug katawa.
Matod sa akong inahan, kon madagma barog balik, pamaspas unya padayon og lakaw.