Nanumpa ubos sa landong sa One Cebu party ang tanang mga opisyal sa mga barangay, sama sa konsehal ug Sangguniang Kabataan (SK) sa lungsod sa Sta Fe, isla sa Bantayan sa Miyerkules, Nobiyembre 23, 2022.
Ang oathtaking ceremony gipangulohan ni Cebu Governor Gwendolyn Garcia.
Matod ni Sta. Fe Mayor Ithamar Espinosa nga usa sa mga hinungdan sa pagtapon na sa mga opisyal sa partido mao ang padayong paglambo sa lungsod ilabi na sa natad sa turismo.
“Nikalit og sikat ang Sta. Fe. Nakita gyud ni sa atong mga barangay officials nga kanhi dili kauban nato mao nang nag istorya hangtud nga ni come up nga mopasilong na sila sa landong sa One Cebu political party mao ning nadiskusyonan, nasabutan nga mo take oath sila karong hapuna,”matod ni Espinosa sa Nobiyembre 23, 2022.
Ang mga barangay official giisip nga non-partisan, pasabot nga walay gidapigan nga partido ilabi na atol sa eleksyon o pagduso na sa certificate of candidacy (COC).
Kini maoy gipasabot ni Atty. Lionel Castillano, election supervisor sa Commission on Elections (Comelec) Province.
“Non partisan in barangay as far as election laws is concerned only during their elections. Meaning in the filing of their COC they cannot attach a nomination from the political party (cona)... Some legal experts would say they are also covered by freedom of association as provided for under the constitution,” matud ni Castillano sa mga tigbalita.
Apan ang gobernador, sa iyang bahin, nagkanayon nga dako ang iyang pagpasalamat sa desisyon ug suporta sa mga opisyal sa tinguha nga mahiusa ang mga Sugboanon ilabi na sa paghatag og saktong serbisyo ngadto sa mga konstituente niini.
“Sa akong tan-aw labing una nga nagpakita nga mahimo gyud diay sa kadaghang katuigan nga nagkabuak-buak ang katawhan tungod kay nagkabuwag-buwag ang mga lideres mahimo gyud diay nga ihiklin ang mga kaligutgot , ihiklin ang mga pagdumot ug molantaw sa unahan mopili nga labaw sa tanan, labaw sa personal ug kinaugalingong interes ang kaayuhan sa kadaghanan mao gyud ang ipatigbabaw dinhi ninyo gipakita sa lungsod sa Sta. Fe,” matud ni Garcia.
Nanghinaot si Garcia nga mahimo kini nga ehemplo sa uban pang kalungsoran ug barangay nga makighiusa kanila alang sa mas malambuon nga Sugbo.
Gawas kanila, gikatakda usab nga mosunod pagpanumpa ang tanang lokal nga opisyal sa Isla sa Camotes ning semanaha.