Way plano ang Lapu-Lapu City Police Office (LCPO) sa pagsikop sa mga tawo nga masakpan nga nanaygon sa kadalanan sa dakbayan karong panahon sa Pasko.
Si Police Colonel Elmer Lim, LCPO director, niingon nga iya nang gimanduan ang tanang hepe sa mga police station sa dakbayan nga badlungon na lang ang mga manaygunay inay dakpon.
“Ber naman gud, gikan pa sa September 1 to December, naa nay mga manaygon ba, dili lang sa Lapu-Lapu but sa other cities. Pero sa atong case dinhi sa atong area of responsibility, badlungon gyud na nato kon makit-an nato bisan unsang orasa,” ni Lim.
Si Lim niingon nga bahala na ang City Social Welfare and Development Office (CSWDO) kon mohimo ba sila og rescue operation, partikular na sa mga menor de edad nga masakpan nga nanaygon.
Hinuon, ang city director nipasalig sa CSWDO, kinsa maoy nangulo nga ahensya kalabot niini nga andam silang motabang kanila sa rescue operation kon magkinahanglan sila og tabang.
Pinaagi sa pagbadlong sa mga caroler sa kadalanan sa dakbayan, si Lim niingon nga makatabang kini nila sa paglikay sa dili maayo o vehicular incidents.
Apan giklaro ni Lim nga gitugotan gihapon ang mga caroler nga makaadto sa mga balay ug pinuy-anan.