Konsehal nabalaka sa grabeng pagsaka sa HIV sa Cebu City

Ang Cebu City Council pinaagi ni City Councilor Rey Gealon nagtinguha nga mahatagan og solusyon ang taas nga kaso sa human immunodeficiency virus (HIV) dinhi sa dakbayan sa Sugbo.

Sa interbyu sa Superbalita Cebu sa Biyernes, Nobiyembre 25, si Gealon nakurat dihang iyang nahibaw-an base sa report sa national media nga niabot og 8,407 ka mga individual ang na-diagnosed og HIV, sinugdanan sa Acquired Immune Deficiency Syndrome (AIDS) sa Central Visayas sa unang lima ka mga buwan sa 2022.

Sa maong record gikan sa Enero hangtod sa Mayo, 4,993 niini gikan sa Cebu City kun 59% sa mga bag-ong kaso sa HIV.

Ang buhatan ni Gealon nagpadala og suwat kang Dr. Daisy Villa, pangulo sa City Health Department (CHD), aron mahatagan sila og update sa kaso gikan sa Hunyo ngadto sa Nobiyembre ning tuiga aron ilang matandi sa miaging tulo ka tuig.

“I write to you in aid of legislation to enable this representation to effectively legislate on matters withn your department, especially on the increasing number of newly diagnosed HIV and AIDS individuals,” mabasa sa suwat ni Gealon.

Ang pagpasawo og dagom kun syringe nagpabiling nag-unang rason sa pagpanakod sa HIV.

Sa grupo sa edad, nag-una ang nag-edad og 25-34 anyos nga nilangkob sa 45 porsiyento.

Nisunod ang mga nag-edad og 15-24 anyos nga nilangkob sa 27 porsiyento ug ang mga nag-edad og 35-49 anyos naa sa 24 porsiyento.

Mga nag-edad og 50 anyos pataas nilangkob sa 4 porsiyento.

Ang first termer nga konsehal gusto nga makigtambayayong sa buhatan ni Villa aron makahimo sila og mga lakang sa Konseho para malimitahan kon dili man hingpit malikayan ang pagkatap sa maong sakit.