Hangtod nga di ipatuman sa hingpit sa bike lanes board ang ordinansa nga naghimong rekisito sa pagpasul-ob og helmet, daghan gihapon ang wa magsul-ob. Tingali gimahalan sila o kaha wa nakakita sa kaimportante niini. Basin ang duha ang ilang mga rason.
Sa among giorganisar nga mga ride sa nagkalainlaing event, "no ride, no helmet" ang among gipatuman.
Gusto namo nga edukahon ang mga biker kon unsa ka importante ang helmet alang sa kaluwasan sa rider.
Mao ni ang among adbokasiya kaniadto sa Tindak Bisdak Folding Bike Society.
Amo sab gitudlo ang kaimportante sa blinkers panahon sa kagabhion ug pag-atiman sa biseklita.
Makapahasubo lang kay sa akong tan-aw wa nay nagtabang karon sa pag-edukar sa mga biker.
Tan-awa lang gud ning mga delivery rider nga nagbiseklita, magpataka lang sa pagdagan sa ilang bike, suotsuot sa trapiko nga nag counterflow.
Kapila na ko hapit makabangga ani nila sa mga eskina sa one-way nga mga dan.
Daghan ani nila wa say helmet. Ambot sab ning food delivery company wa makaedukar sa ilang riders.
Igo ra ni silang gidawat ug gi-orient sa polisiya sa kompaniya tingali, unya naa may biseklita, ila na kining patrabahuon.
Kon gitudloan pa kini sa sakto ug luwas nga pagbiseklita, naa unta silay helmet ug blinkers. Apan kadaghanan ani nila wa nagsul-ob.
EDUKASYON
Kini untang importante kaayong magamit sa inadlaw nga mga buhat, sama sa traffic rules, sakto nga pagmaneho ug uban pa, sa bata pa unta gilakip na pagtudlo sa tunghaan.
Kon sa bata pa gisugdan pagtisok ang liso, nakagamot unta og maayo ang maayong mga buhat sa karsada.
Maanindot gani kon ang pagbiseklita giapil sa pagtudlo sa physical education classes. Ma-apply pa ni sa pang-adlaw adlaw nga pagpanginabuhi.
Gani sa Japan, dunay mga tunghaan nga naghimong compulsory sa pagkat-on sa biseklita.
Unta, kon himuon kini dinhi sa Pilipinas alang sa mga bata, dako ni og ikatabang sa suok nga mga dapit nga lisod ang sakyanan.
Bitaw, daghang mga lungsod nga unta, nagproyekto sa biseklita ug gipanghatag sa mga tinun-an nga nagpuyo sa lagyo nga mga dapit. Dako unta kini og ikatabang.
DAGHAN GIHAPON
Bisan kon nagkahinay na ang Covid-19, daghan gihapon ang nagbiseklita nga akong makit-an sa kadalanan, gatungas Busay o padung sa kabukiran sa Talamban area.
Daghan sab ang mga batan-on nga naengganyo na sa pagbiseklita. Mas daghan pa unta kon ang biking gihimo untang kabahin sa pagtudlo sukad pa sa kinder ngadto sa elementary.
Way dapit nga mabiseklitahan? Nganong makaduwa man og mga ball game ang mga bata sa mga tunghaan?
Mas mapuslan pa ang pagtudlo og biseklita sa mga bata kay sa ball game.
Okay ra ang pagtudlo sa bata og ball game, apan mas maayong ilakip ang biking, labina sa mga tunghaan nga dunay igong gilapdon sa grounds. Makaguol, way nakakita sa kaanindot niini.