Nagplano si Presidente Ferdinand “Bongbong” Marcos Jr. nga mohatag ang kagamhanan og scholarship niadtong gustong moeskwela pagka nurse ug sa uban pang mga medical nga kurso. Kini taliwa sa nagkagamay nga gidaghanon sa mga nurse sa nasod kay daghan kanila ang nang-abroad diin toa didto ang mas dako nga sweldo nagpaabot.
Kadtong scholars sa kagamhanan, kon mo-graduate na, patrabahuon una og pipila ka mga tuig sa gobiyerno una pa sila buhian. Sa ato pa, mamawi una ang kagamhanan sa investment pinaagi sa pagpaserbisyo kanila.
Sama ra sab ni sa mga graduwado sa mga tunghaan sa militar ug kapulisan nga kinahanglan sila moserbisyo una sila sa kagamhanan og pipila ka katuigan.
Ang mga adunahang nasod, labina sa Kasadpan, dugay rang nanginahanglan og mga nurse, labina gikan sa Pilipinas nga larino kaayong motabi og English. Namatud-an usab ang kamaayo nga moserbisyo sa mga Pinoy kon mga langyaw na ang pasultihon.
Hagbay rang nag-antos ang nurses sa kagamay sa ilang suweldo, labina sa pribadong mga tambalanan.
Imagine sa kadako sa gasto ug kakapoy nga ilang nasinati dihang nagtungha pa sa kurso. Apan unyag lisensyado na ug motrabaho, ang iyang sweldo di igo ikabayad sa dakong gasto ug grabeng kahago.
Naa gani ubang mga nurse nga palabihon nga sama lang sila og volunteer lang aron duna silay experience sa ilang pag-apply og trabaho sa abroad. Pila kaha ka mga ospital ang naghimo niini?
Arang-arang na lang ang mga nurse nga naa sa mga ospital sa kagamhanan kay dako-dako pa og sweldo, apan ubos gihapon kini kon ilang trabaho ug kapabilidad ang hisgutan.
Hinaut pang di dugayon sa kagamhanan ang planong scholarship kay pipila ka mga tuig karon, dako ang kahigayunan nga magkuwang ang mga nurse sa nasod nga anam-anam nang nanglayas alang sa “greener pasture.”