Mga bukog o kalabera sa lima ka mga tawo ang nakit-an ilawom sa yuta sulod sa compound sa Department of Justice (DOJ) sa Manila, sumala sa tigpamaba sa DOJ sa Biyernes, Nobiyembre 25, 2022.
Si Justice Spokesperson Mico Clavano niingon nga mga bukog lakip na ang mga kalabera, ang nakit-an duol sa ibabaw samtang ang mga trabahante nagkalot niadtong Huwebes taliwala sa pagtukod sa upat ka andana nga building luyo sa main building sa DOJ.
Si Clavano niingon nga ila nang gi-tap ang pathology expert nga si Dr. Raquel Fortun bahin sa mga nadiskubreng bukog.
“She’ll be here with an anthropologist and she advised us the next time na makuha natin ‘yung ganung klaseng skeletons or remains na not to touch it,” matod ni Clavano.
“We will be meeting with several other archeologists, anthropologists para madiscuss natin ‘yung possible nating gawin,” dugang niya.
Sa usa ka tweet, si Fortun niingon nga ang asosasyon sa mga bukog sa panahon sa ilang pagkadiskobre importante.
“Your chances of getting [information] from those remains depend a lot on how careful you document and recover them and the artifacts they’re with. Refer to experts,” matod ni Fortun.
Matod ni Clavano nga wala sila masayod sa tukmang pamaagi sa maong butang ug gi-turn over dayon sa National Bureau of Investigation (NBI) ang mga narekober nga kalabera.
Niadtong 2009, naka-recover usab og mga kalabera ang mga construction worker, lakip na ang duha ka kalabera nga gituohang nalubong sa miaging 25 ka tuig sulod sa DOJ building.(SunStar Philippines)