Usa ka 64 anyos nga biyuda sa Sitio Ilang-Ilang, Barangay Lagtang, dakbayan sa Talisay ang nasurprisa sa gasa o sayong Pinaskuhan nga grocery items ug makina sa panahi gikan sa Talisay City Police Station (TCPS) niadtong buntag sa Biyernes, Nobiyembre 25, 2022.

Si Police Lt. Col. Randy T. Caballes, hepe sa TCPS, uban sa iyang mga personnel mao ang ninghatod sa mga Pinaskuhan sa barungbarong ni Nanay Guillerma Labrador, kinsa gihulagway sa kapulisan nga gibati sa tumang kalipay sa ilang pag-abot.

Matod ni Caballes, dunay silingan ni Nanay Guilerma nga nidangop sa ilang buhatan ug nihangyo nga matabangan kini tungod sa iyang makaluluoy nga kahimtang.

Wala siya makapabarog sa iyang balay human giguba sa bagyong Odette sa Disyembre 16, 2021 ug nagpasilong na lang sa barungbarong nga gihikot sa kahoy uban sa anak nga dunay sakit.

Human sa pagsusi, ang Randy T. Caballes (RTC) Cares sa TCPS, niaksiyon dayon sa pagtunol sa hinabang.

Mapasalamaton usab si Caballes sa mga tawo nga ningsuporta sa ilang programa nga ‘Grant A Wish’ sama nila ni Toledo City Councilor Dong Raffy Arrojo ug Cyril Velasco, pesidente sa City of Talisay-Chamber of Commerce and Industry.

Sa 2020, ang Philippine National Police nilusad sa “Kapwa Ko, Sagot Ko!” Adopt-a-Family Program nga nagdasig sa pagtabang sa kabus nga pamilya ubos sa ilang hurisdiksiyon. (GPL / Hulagway gikan sa Facebook ni Randy T. Caballes)