Usa ka tindero og utanon namatay human kini gisumbag sa wala mailhing lalaki sa Sitio Taboc, Barangay Looc, dakbayan sa Danao niadtong Sabado, Nobiyembre 26, 2022.
Gideklarar nga dead on arrival (DOA) sa Cebu Provincial Hospital-Danao City ang biktima nga giilang si Mark Gil Albaño Nebria, 38, ug residente sa lungsod sa Compostela.
Si Lieutenant Colonel Fortunato Ecle Jr., hepe sa Danao City Police Station, niingon nga ang igsuon ni Mark nga si James nitaho kanila mga alas 3:40 sa kaadlawon.
Matod ni James, nag-inom sila dihang niabot ang live-in partner sa iyang igsuon. Iyang gisita siya tungod sa ulahi nga paggawas ug ang duha nagkalalis sa dalan.
Sa kainit sa ilang panaglalis, gitukmod ni Mark ang iyang live-in partner.
Dugang ni James nga usa ka wa mailhing lalaki ang niduol kang Mark ug giingnan ang naulahi nga dili suklan ang babaye hinungdan nga nasuko ang iyang igsuon.
Gisultihan ni Mark ang lalaki nga hunahunaon ang iyang kaugalingon nga negosyo ug ang duha nagkalalis.
Matod niya, kalit lang gisumbag sa lalaki ang iyang igsuon ug nawad-an sa panimuot.
“Pagkahagba sa biktima, nagtuo sila nga okay ra kay nakainom lagi. Unya wala na may panimuot, gidala sa tambalan, DOA,” matod ni Ecle.
Si Ecle nagkanayon nga posibleng wala magtuo ang suspek nga namatay si Mark human siya gisumbag, kay gusto lang niya nga dili na pasakitan sa biktima ang iyang live-in partner.
Matod ni Ecle, iya nang gimandoan ang iyang mga imbestigador sa pag-ila sa suspek.
Base sa findings ni Dr. Nestor Casidre Jesson Lim sa Cebu Provincial Hospital - Danao City, ang biktima namatay sa hemorrhage shock, subarachnoid hemorrhage secondary to blunt trauma ug secondary to mauling. (GPL)