Patay human naunay sa iyang service firearm ang usa ka security guard nga nag-duty sa Chicumi Agriventures Slaughtering sa Sitio Ilang-Ilang, Barangay Greenhills sa lungsod sa San Fernando, Cebu, alas 2:00 sa kaadlawon sa Sabado, Nobiyembre 26, 2022.
Si Isagani Bajarias Pelimer, 44, minyo, barangay tanod ug molupyo sa nahisgutang lugar, ang gideklarar nga dead on arrival (DOA) sa tambalanan sa dakbayan sa Carcar.
Si Police Corporal Dhex Anthony Balaod sa San Fernando Police Station nga nahinabi sa Superbalita Cebu, nagkanayon nga ang trabahante sa trabahoan nakadungog sa usa ka sipang buto sa armas ug sa pagsusi, nakit-an ang sikyu nga nagkadugo nga dunay samad pinusilan sa wala nga bahin sa lawas.
Matod ni Balaod, nakuha sa crime scene ang usa ka .38 revolver nga dunay lima ka bala ug usa niini kabhang na.
Nakita sab nga ang holster sa armas sa sikyu dunay agi sa lungag sa bala ug sa iyang sling bag.
Kini ang hinungdan sa pagtuo sa kapulisan sa San Fernando nga nasabod ang armas sa iyang sling bag ug aksidente kining nibuto nga niigo sa biktima.
Atol ning pagsuwat, nihimo og dugang imbestigasyon ang kapulisan sa nahitabo.