Vitor andam modepensa sa WBO Oriental belt

Wa mosaad og knockout nga kadaugan si World Boxing Organization (WBO) Oriental super featherweight champion John Virgel Vitor sa iyang unang pagdepensa sa titulo karong Disyembre 8, 2022 sa Calape Coliseum sa lungsod sa Calape, Bohol.

Apan ang 25-anyos nga Vitor aka Valiente mipadayag nga di usab niya palabyon kon itugot man gani sa kahigayonan.

Ikasangka ni Vitor sa iyang unang pagdepensa ang Koreanong challenger nga si Dong Kwan Lee, kinsa pulos Pinoy ang gipangbiktima sa iyang uwahing duha ka away.

“Dili lang ko moingon og naay knockout, pero as long nga makita nko ang sayon nga butas nga naay opportunity nga pwede so, akung i-grab,” matod ni Vitor sa online interview.

“Ready na ko, para sa pag- depensa sa akong bakos puhon, ug 100 percent ready na sab ko sa among game plan nga giandam sa akong trainor para sa duwa,” sigon ni Vitor, kinsa adunay 19-2 nga baraha.

Gisaysay ni Vitor nga way mga kalisdanan siyang nasugatan sa iyang training ug sa miaging semana nakahimo na usab siya og sunodsunod nga 12-round sa sparring session.

Dili usab problema alang kaniya ang pagkuha sa 130 lbs. Sa pagkakaron, siya adunay gibug-aton nga 136 lbs. ug dili lisod ang pagtibhang na unya niini atol sa tinimbangay.

Iyang gitug-an nga ila nang naestudyohan ang estilo sa iyang kontra ug daw sa haom usab kini iyang style.

Apan bisan pa man niini way luna sa kompiyansa ang iyang buhaton ug iyang girespotahan ang abilidad sa 30-ayos nga Koreano kinsa naghupot og 16-2-2 nga baraha.

“Nakahuman nako og duha ka 12 rounds sparring sa miaging semana, ug karon nagpaubos nako sa rounds. Maintain na lang mi sa akong trainor og four rounds every sparring. By next week sa timbang na sad mi mag-focus magpaubos. Pero ok man akong timbang walay problema maintain lang sa condition,” dugang ni Vitor.

“Ang akong ka sparring si Arnel Tinampay ug ang iyang manghod nga si Jason Tinampay ug si Daniel Nicolas nga moduwa sab og title fight sa undercard puhon.”

Si Lee, sa iyang bahin, nakabiktima na og duha ka Pinoy fighters nga sila si Roemart Sentillas nga iyang gi-knockout sud sa duha ka rounds ug Michael Landero nga iyang napukan pinaagi sa desisyon sa ilang WBC Asian Boxing Council Silver featherweight title sa 2021. (JBM)