L.A. Lakers giusban ang Spurs

Mipabuhagay og season-high 39 puntos si Lebron James aron aswaton ang Los Angeles Lakers, 143-138, ngadto sa kadaogan batok San Antonio Spurs kagahapon sa National Basketball Association (NBA) regular season game sa San Antonio, Texas.

Ang 37-anyos nga beterano milabni pud og 11 ka rebounds sa ikaduhang kadaogan batok sa Spurs nga ilang pud nga gikastigo niadtong Sabado sa iskor nga 105-94.

Ang point guard nga si Dennis Schroder mitunol og 21 puntos ug unom ka assists, samtang ang kanhi player sa Spurs nga si Loonie Walker IV mikamada og 19 puntos, 13 niini gimugna sa fourth quarter alang sa Lakers.

“We gave up a ton in transition, we turned the ball over, couldn’t get a defensive rebound at times,” batbat ni Lakers head coach Darvin Ham. “But again, when you’re able to score the ball, it covers up for a lot of mistakes.”

Samtang mipakita sa iyang katakos si James sa iyang ikaduha nga duwa human ang five-game absence, nagpahuway sa sideline ang big man Anthony Davis tungod sa bruised left calf.

Nagkainit karon ang Lakers kinsa midaog og lima sa uwahing unom ka duwa aron makaabante ngadto sa 7-12 (win-loss) record nga baraha aron makabawi sa bati nga 0-5 nga sugod sa season. Bisan pa man sa duha ka kapildehan batok sa Lakers, wa momahay si San Antonio coach Gregg Popovich sa iyang mga batos.

“They have got great character,” matod niini. “I thought they were fantastic. I am proud of them. They just keep playing. It doesn’t matter what the score is, or who is there or who is not there, they are unbelievably coachable and they are trying very hard to do what we want them to do. I was just thrilled and proud of them tonight.”

Si Keldon Johnson nakimo’g double-double 26 puntos ug 10 rebounds, si Tre Jones adunay 23 puntos ug 13 assists ug si Devin Vassell mipakatap og 19 puntos alang sa Spurs nga nahagsa sa 6-15 rekord. (RSC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph