NAKADAGAN ang mga molupyo sa bul-og sa baha alas 2 sa kaadlawon niadtong Dominggo, Nobiyembre 27, 2022, sa probinsiya sa Cotabato.
Matud ni Alvin Ratera nga molupyo sa Sitio Campo Uno, Barangay Kimarayag, Pigcawayan, Cotabato nga halos tibuok gabii kusog ang bunok sa ulan sa ilang dapit.
Gipasidan-an dayon sa mga opisyal sa barangay ang mga namuyo daplin sa sapa ug bukid nga magbantay sa bul-og sa baha lakip na ang pagdahili sa yuta.
Gikanayon ni Ratera nga halos wala silay tulog, unya taud-taud ang milabay, ilang nadungog nga daw nagdahunog sa taas sa bukid subay sa sapa.
Abtik nga nanagan ang mga molupyo paingon sa taas nga bahin palayo sa sapa.
Pipila ka gutlo lang ang milabay, miigo ang kusog nga baha ug gilampurnas niini ang kabalayan duol sa Kimarayag River ug naguba pa ang hanging bridge.
Suwerte nga walay nadisgrasya sa baha gawas lamang sa mga kabtangan ug kahayupan sa mga molupyo sa Sitio Campo Uno nga gianod.
Kahinumdoman nga niadtong miaging bulan usa ang patay sa grabeng baha sa Pigcawayan atol sa Bagyong Paeng.
Gitakda sab nga magpaabot og hinabang si Pigcawayan Mayor Juanito "Toto" Agustin sa mga pamilya nga apektado sa baha sa Sitio Campo Uno.