Usa sa mga nagbalikbalik nga problema sa dakbayan sa Sugbo ug ubang bahin sa Metro Cebu mao ang basura. Dili kini isyu lang kabahin sa panglawas ug kahugaw sa panan-aw, nakahimo kini og komplikasyon sa pagkabara sa walay tino nga gidak-on ug sistema sa drainage system.
Giila ang basura nga nag-unang hinungdan nga masampongan ang agian sa tubig sama sa mga kanal, sapa ug suba. Baha ug lunop ang resulta tungod sa pag-awas sa tubig o walay maagusan human nasungsongan ang agianan sa mga basura.
Dili ba makadaghan na kita makadungog og paghimo og clean-up drives sa kabarangayan, grupong sibiko ug relihiyuso, mga tunghaan ug nagkalainlaing ahensiya sa kagamhanan. Apan hangtod karon, ang problema sa basura wala mapapas ug padayong bida sa kahasol panahon sa ting-uwan.
Pareho sa problema nga nasugatan sa mga opisyal sa Barangay Carreta, siyudad sa Sugbo nga gipangulohan ni Barangay Captain Marciano Ando nga limpiyo sa sapa nga nitadlas sa Sityo Kalapukan ug Sityo Cemper niadtong Sabado, Nobiyembre 26, 2022.
Matod ni Ando, naabot sa iyang buhatan ang mga reklamo sa mga residente sa naasoy nga dapit human dili makayanoyano sa paglakaw sa gawas kon dili magsul-ob og butas ug sa ilang pagsubay sa maong mga dapit, nakita niya ang daghang basura nga dili malata.
Usa sa nakita sa lider sa barangay nga daghang nanimuyo sa dapit ug nagsikit na ang kabalayan lakip nga niabot na mismo sa kanal. Hinuon, ang naasoy nga mga sityo ug dugang duha ka sityo sa Carreta ang maapektohan sa hugot nga pagpatuman sa 3-meter easement zone.
Unsay hinungdan sa pagbalikbalik sa problema sa basura? Tataw nga ang katawhan mismo nga way kooperasyon sa paghimo sa ilang dapit nga luwas ug limpiyo ang palibot. Hipuson ang basura sa tukmang sudlanan. Puniton kon dunay makita nga basura.
Ang clean-up drives dako og matabang apan, ang mas mahukmanon mao ang kooperasyon sa tanan aron dili na kini magbalikbalik nga problema.