Magsugod na ang City of Naga Police Station sa habagatang Sugbo sa pagtanyag sa National Police Clearance (NPC) karong Lunes, Nobiyembre 28, 2022.
Si Lieutenant Colonel Junnel Caadlawon, hepe sa istasyon, niawhag sa mga residente nga gustong mo-secure nga mo-log in una sa pnpclearance.ph ug mo-fill up sa online application ug maghimo og online appointment.
Matod niya, makabayad sila pinaagi sa Landbank of the Philippines, Bayad Express, SM Bayad Center, Cebuana Lhuillier Pawnshop, Palawan Pawnshop, RD Pawnshop, Paymaya, GCash, BDO Unibank, ug uban pa.
Matod ni Caadlawon, adto na sila sa police station ug makapakita og duha ka valid ID, ang reference number ug ang opisyal nga resibo sa bayad sa police clearance sa ilang gikatakda nga appointment.
Ang ilang litrato, fingerprints, digital signature ug biometrics kuhaon sa estasyon, matod niya.
Kon ma-verify na ang ilang aplikasyon, susihon sa usa ka pulis ang ilang biometrics ug criminal records batok sa database sa Philippine National Police (PNP). Kon malampuson ang ilang aplikasyon, kinahanglan sila nga moagi sa lain nga proseso sa pag-verify. Kon masulbad na kini, ma-release na ang ilang police clearance, dugang niya.
Samtang si Caadlawon niingon nga nalipay siya nga ang City of Naga Police Station maoy napili nga motanyag sa NPC.
“Lipay mi kay nindot ni nga programa sa katawhan dinhi dili na sila mahasol," siya niingon.
Ang web-based nga National Police Clearance System, nga giinagurahan niadtong Agusto 2018, nagtugot sa mga Filipino nga makakuha og police clearance nga wala pay 10 minutos sa bisan unsang oras tungod kay kini nalambigit sa PNP database nga naghimo sa proseso sa pagkumpirma sa kriminal nga kasaysayan sa aplikante ug biometric nga impormasyon nga mas epektibo. (GPL)