Sa dili madugay, makabaton na og mas dako ug mas “sophisticated” nga public library ang dakbayan sa Sugbo kay gilantaw ni Mayor Michael Rama ang Singapore-like library nga posibleng tukoron sa South Road Properties (SRP).
Gihangop ni City Librarian Rosario Chua ang maong plano, ilabi na kay limitado ang reading capacity sa Rizal Memorial Library and Museum sa Osmeña Boulevard karon.
Sa usa ka recorded video message nga gipresentar atol sa 88th National Book Week nga selebrasyon niadtong Huwebes, Nob. 24, 2022, si Rama miingon nga ang “dako ug siguradong sama sa Singapore” nga library dili lang mapuno sa mga libro kondili masangkapan usab sa teknolohiya.
“Gipaambit nako kini nga panan-awon sa tanan. Atong sangkapan ang atong librarya, ang determinasyon kon unsa ka ka-urbanisado ang siyudad, kon unsa ka sopistikado ang atong librarya,” ingon niya.
Si Rama, kinsa didto sa Singapore niadtong tungora uban sa iyang pamilya alang sa pagbakasyon, niingon nga ang dapit sa bag-ong library ikonsiderar pa apan basin sa SRP kini tukoron.
Matod ni Chua, ang kasamtangan nga public library kay maka-accommodate lang og 150 ka mga tawo ug abli lang sa alas 8:00 sa buntag hangtod sa alas 5:00 sa hapon, panahon sa mga adlaw sa semana.
Sa kasamtangang populasyon sa dakbayan sa Sugbo nga kapin na sa usa ka milyon, si Chua niingon nga gikinahanglan gyud ang mas dakong public library.
Sa wala pa ang sakit nga coronavirus (Covid-19) pandemiya, ang publiko nga librarya adunay hangtod sa 11,000 nga mga bisita matag bulan sa aberids, apan ang gidaghanon mikunhod sa 3,000 tungod sa mga pagdili, ingon niya.
Si Chua niingon nga ilang hangyuon ang City Government nga tugotan ang public library nga maka-operate panahon sa weekend ug abli hangtod alas 8 sa gabii. aron ma-accommodate ang daghang mga tawo.
Dugang pa sa librarian nga aduna gihapoy mga tawo nga gustong makakuha og impormasyon pinaagi sa mga libro ilabi na ang mga tinun-an nga gikinahanglan nga mogamit og libro alang sa ilang panukiduki.
Bisan pa, dili ikalimod nga tungod sa pag-uswag sa teknolohiya ug pagkaanaa sa internet, ang gidaghanon sa mga tawo nga nagbisita sa mga librarya mikunhod, ingon niya.
Samtang, nagtuo si Chua nga mas katuohan ug kasaligan ang impormasyon nga nakuha gikan sa mga libro kon itandi sa mga anaa sa internet.
“Ang atoang books gyud kay (Our) authoritative, so we can rely (on) the information written ana nga mga (on the) books. Usahay kon daghan na kaayo nga (Sometimes there is too much) information nga naa sa (on the) internet, ang bata maglisod og ila kon asa ang tinuod o dili (maglisod ang mga bata sa pagdesisyon kon unsa ang tinuod o dili),” matod niya.
Ang publiko nga librarya, bisan pa, wala nagsira sa mga pultahan sa teknolohiya tungod kay nagtanyag gihapon kini nga libre nga koneksyon sa WiFi ug pag-browse sa internet.
Gawas sa mga libro sa pangkinatibuk-ang edukasyon, ang publikong librarya usab adunay mga koleksiyon sa “unique” nga mga libro ug mga artikulo bahin sa Sugbo nga dili makita sa internet, matod ni Chua. (IRT)