Mokabat sa 700 ka mga pamilya nga nawad-an og pinuy-anan human sa dakong sunog nga niigo sa baybayong Sitio Paradise sa Barangay Looc, dakbayan sa Mandaue niadtong Martes sa gabii, Nobiyembre 22, 2022 nakadawat og dugang hinabang nga balor og P5 mil matag pamilya.
Ang naasoy nga ayuda gikan sa kagamhanan sa dakbayan sa Mandaue ug buhatan ni Senador Bong Revilla.
Mainiton nga gihangop si Revilla sa mga biktima sa sunog nga ang kadaghanan temporaryong gipahiluna sa mga modular tent nga gibutang sa covered court sa Mandaue City Central School.
Kauban sa Senador mao sila si Kong. Emmarie Lolypop Ouano Dizon, Mayor Jonas Cortes, JCI Metro Cebu Uptown, JCI Zugbuana ug Cebu Lions Mandaue sa pagpanghatag og ayuda nga tag P5 mil, diin P3 mil gikan kang Revilla ug P2 mil gikan sa dakbayan sa Mandaue.
Si Revilla nanghatag usab og toiletries samtang si Cong. Ouano Dizon miamot og tualya.
Ang host sa Lions Mandaue nanghatag og 5 ka kilo nga bugas samtang ang JCI Cebu uptown ug JCI Zugbuana, nanghatag og daan nga mga sinina, pagkaon ug tubig.
Matod ni Revilla nga nakasabot siya sa sitwasyon sa mga nasunogan sa Looc hinungdan nga gitubag dayon niya ang hangyo ni Kong. Dizon alang sa pagpanghatag sa cash assistance. (PR)