DILI mominos 5,000 nga unang benepisyaryo sa dakbayan sa Sugbo sa Tulong Panghanapbuhay sa Ating Disadvantaged/Displaced Workers (Tupad) makadawat og hinabang sugod sa Huwebes ngadto sa Sabado, Disyembre 2-3, 2022.
Kini ang gibutyag ni Cebu City Second District Rep. Eduardo “Edu” Rama Jr. kagahapon, Nobiyembre 27, 2022.
Ang maong mga benepisyaryo gi-hire ubos sa unang batch sa Tupad uban sa mobilization assistance gikan sa district office ni Congressman Rama sa dakbayan sa Sugbo.
Ang Tupad usa ka social amelioration program sa Department of Labor and Employment (Dole) nga gituyo nga maghatag og 10 ka adlaw nga trabaho sa mga kwalipikadong benepisyaryo bugti sa minimum nga sweldo.
Karong tuiga, pinaagi sa paningkamot ni Rep. Rama ug sa iyang buhatan, ang kagamhanan sa dakbayan sa Sugbo nakatabang sa programa sa mga kwalipikadong benepisyaryo niini, sugod sa sunodsunod nga back-to-back orientation nga nahitabo sa lainlaing barangay sa south district, niadtong Oktubre 6.
“Nakig-coordinate na ta sa DOLE nga makadawat na ni sa ilahang sweldo ug kapin 5,000 ka beneficiaries sa TUPAD sa atong 31 ka barangay sa dakbayan. (We have coordinated with the office of DOLE 7 to schedule their payouts for the 5,000 beneficiaries of TUPAD in our 31 barangays in Cebu City),” matod ni Rama.
Dugang pa sa Kongresista nga ang maong mga benepisyaryo makadawat og minimum nga sweldo nga P435/adlaw sulod sa 10 ka adlaw. Ang unang batch niini nga mga benepisyaryo mao ang nakakompleto sa ilang gikinahanglang mga dokumento human sa ilang community service.
“We are aiming nga ang tanang beneficiaries makadawat sa ilang payout bag-o magPasko. Atoang gituyo nga sa Disyembre dili nila madawat aron anaa sila’y pangpinaskohan sa ilang kaugalingon. Kini usa ka regalo sa Pasko sa ilang kaugalingon,” dugang sa Kongresista.
Ang mga benepisyaryo gisuholan sa paghimo sa mga proyekto sa katilingbanong komunidad, sama sa pag-ayo, pagmintinar, ug/o pagpaayo sa komon nga publikong mga pasilidad ug imprastraktura sama sa mga eskwelahan ug health centers, debris clearing, de-clogging sa mga kanal, debris segregation ug materials recovery, stockpiling ug clearing sa ilang tagsa-tagsa ka barangay. (PR)