Nikabat sa 93 ka loose firearms ang na-turnover o nasakmit sa mga sakop sa Regional Mobile Force Battalion Central Visayas (RMFB 7).
Matod ni Lieutenant Colonel Ronan Claravall, force commander sa RMFB 7, nga nakabase sa habagatang lungsod sa Sibonga, Cebu, nakuha nila ang 54 ka .38 revolver, 10 ka 5.56 revolver, 10 ka .22 revolver, siyam ka improvised shotgun, unom ka .45 nga pistola, duha ka 9mm revolver ug usa ka improvised 5.56 ug usa ka improvised 7.62 rifle sukad niadtong Agusto 2022.
Dugang niya nga ilang gihingusgan ang ilang kampanya batok sa dili lisensyadong mga armas aron dili kini magamit sa mga kriminal nga elemento.
Gihangop ni Police Regional Office Central Visayas Director Brigadier General Roderick Augustus Alba ang maong kalambuan atol sa iyang pag-inspeksyon sa RMFB 7 niadtong Biyernes, Nobiyembre 25, 2022.
Giawhag ni Alba ang publiko nga i-surrender dayon ang mga armas nga walay lisensya sa labing duol nga police station sa ilang lugar ug dili na maghulat pa nga i-serve sa kapulisan ang warrant gikan sa korte.
Sa laing bahin, gisusi usab ni Alba ang search, rescue and retrieval (SRR) equipment sa RMFB 7 nga naglakip sa usa ka trak, duha ka search and rescue vans nga makatungas sa kabukiran, duha ka rubber boats ug usa ka speed boat nga gigamit sa batalyon nga nagpahigayon og mga operasyon sa Bohol.
Matod niya, ang PRO 7 mohatag og pickup truck nga magamit sa batalyon sa pagpatrolya sa kabukiran sa rehiyon. (AYB)