Duha ka andana nga balay ang naugdaw sa sunog sa Purok Lower 8, Barangay Kamputhaw, dakbayan sa Sugbo, niadtong Sabado sa gabii, Nobiyembre 26, 2022.
Ang mga balay gipanag-iya ni Gonigonda Aum ug usa niini ang giokupar sa iyang umagad nga si Editha Aum.
Matod ni FO3 Fulbert Navarro, duty investigator sa Cebu City Fire Office, nadawat nila ang alarma sa alas 9:34 sa gabii.
Human sa pag-abot sa mga bombero sa dapit duha ka minuto ang milabay, ang sitwasyon giisa dayon sa first alarm. Nakontrolar ang kayo sulod sa 12 minutos. Hingpit napawong sa mga bombero ang kayo sa alas 9:56 sa gabii.
Gibutyag ni Navarro nga nagsugod ang kayo sa ikaduhang andana sa balay nga giokupar ni Editha sa wala pa mikatap sa kasikbit nga balay nga gipanag-iya usab sa iyang ugangan.
Sigon ni Navarro mokabat sa P1.6 milyones ang danyos sa maong sunog.
Gidugang ni Navarro nga base sa ilang inisyal nga pagsusi, ilang nasuta nga usa ra ang wire connection sa kuryente sa duha ka panimalay. (BBT)