USA ka "tulisan" ang nadakpan sa akto sa mga sakop sa Mabolo Police Station nga nagpatrolya sa kadalanan dihang nanulis kini sa usa ka call center agent sa Samar Loop, Ayala Business Center, Barangay Hipodromo, siyudad sa Sugbo, alas 10:45 sa gabii, niadtong Sabado, Nobiyembre 26, 2022.
Si Police Major Eraño Regidor, hepe sa Mabolo Police Station, niila sa suspek nga giingong notadong tulisan ug kawatan nga si Bryl Sumalinog, 26, taga Ponce 1, Barangay Carreta, siyudad sa Sugbo.
Matud ni Regidor, atol sa pagpatrolya sa iyang mga personnel, kalit nga nangayo og pakitabang ang usa ka babaye human siya gitulis.
Dali nga girespondehan ang dapit ug gitudlo sa biktima nga si Estelita Atamosa, 21, nag-abang sa Brgy. Hipodromo apan lumad nga taga Barangay Mayana, lungsod sa Barili.
Naabtan sa kapulisan ang suspek nga padung nang mosibat apan na-corner kini.
Nakuha pagbalik sa mga pulis ang cellular phone sa biktima nga mobalor og P14,000 lakip na ang kutsilyo nga dunay gitas-on nga 10 inches nga maoy gigamit sa pagtulis.
Matud ni Regidor, base sa record sa Carreta, notado na nga tulisan ang suspek ug giingong naila nga tiggamitan sa ilegal nga drugas. (AYB)