Ning nagsaka nga mga presyo sa palitunon, pwerte na lang gamaya sa atong mapalit sa panahon nga anaa ang atong sweldo. Wa kini gipili kon anaa ka sa pribado o publikong sektor ka nagtrabaho karong panahona.

Ang P1,000 karon nga dalhon sa merkado maihap na lang sa tudlo ang imong mapalit. Pilion na lang nato ang unsay importante nga gikinahanglan sa panimalay aron mapaigo unya maghuwat na usab sa sunod panahon sa tingsuweldo.

Nanawagan karon ang mga mamumuo sa publikong sektor, kining mga nagtrabaho sa gobyerno nga umentuhan na ang ilang suweldo. Nidemanda sila nga unta ang minimum wage increase anaa sa P33,000 matag buwan kay di na makaya ang padayong pagsaka sa palaliton.

Ang Department of Buget and Management (DBM) nagpahibawo nga naa pay increase silang madawat kay sa 2023 matapos ang paghatag sa Salary Standardization Law (SSL) 5. Ang SSL 5 gipirmahan ni kanhi Presidente Rodrigo Duterte nga mosaka ang suholan sa 23.24 porsiyento sunod tuig apil niini ang mga magtutudlo ug nars.

Ang gobyerno karon nagmando nga tun-an ang laing pagsaka sa suholan sa 2024. Tumong niini, ang pagsusi sa sweldo sa mga nagtrabaho sa gobyerno nga mapareha na ilang dawaton nga suholan sa pribadong sektor aron kadtong mga naa sa gobyerno nga makamao magpabilin.

Libuan sa mga nars nga anaa sa hospital sa gobyerno namiya na sa atong nasud matag tuig kay dagko man ang sweldo nga gitanyag ang nagkadaiyang mga kanasuran lukop kalibutan. Samtang ang mga magtutudlo nga mga regular nga nagsilbi sa Department of Education (DepED) daghan na usab ang nanglarga sa Estados Unidos sa America kay gitanyagan usab sila og maayo nga benepisyo.

Makasabot ra kita sa ilang gihimo kay ang kaugmaon sa ilang pamilya ang ilang gilantaw kay kon magpabilin nga gamay ilang kita dinhi sa nasud mosamot sila sa kalisod. Buot nilang luwason ang kahimtang sa ilang pamilya nga makatagamtam usab sa kaharuhay kay daghan ang opurtunidad gawas sa nasod kaysa anhi sila magpabilin sa Pilipinas. (josephelvirtubilan@gmail.com)