DUNGAN sa malampusong pagsaulog sa Graduation ug Exit Ceremony sa 150 ka benepisyaryo sa Pantawid Pamilyang Pilipino Program (4Ps), nag-apud-apod usab ang Sustainable Livelihood Program o SLP og livelihood assistance sa pito ka SLP Associations ug 38 ka mga identified nga indibidwal nga biktima sa sunog ug baha sa Syudad sa Dabaw niadto’ng Biyernes, Nobiyembre 25, 2022, didto sa Felcris Centrale, Davao City.
Unom ka asosasyon ubos PAMANA Program nga nakadawat og tag P300,000 ug usa sa Zero Hunger Program nga asosasyon nga nakadawat og P435,000 nga kapital alang sa ilang mga nagkadaiyang proyekto o negosyo.
Niabot sa kapin P2.2 milyon ang nagamit nga pondo alang niini nga programa.
Dungan sab niini natigayon ang paghatag og tag P20,000 nga livelihood settlement grant (LSG) sa 38 ka mga identified ng indibidwal nga naapektuhan ang mga panginabuhian sa nahitabong sunog sa Barangay 76-A ug baha sa Barangay 74-A.
Kining mga indibidwal gitawag nga “referred clients” gikan sa City Social Welfare and Development sa Lokal nga Panggamhanan sa Dabaw diin, naabot sa P760,000 ang nagamit nga pondo para sa LSG.
Gipangunahan ni Regional Director Atty. Vanessa B. Goc-ong ug Promotive Services Chief Elizabeth T. Degorio ang pagpangatag og ayuda ubos sa maong programa.
Ang Sustainable Livelihood Program usa ka “capability-building” nga programa sa DSWD nga nagtumong nga mahatagan og kapasidad ang mga benepisyaryo sa pagdumala og panginabuhian, mapa-negosyo man kini o pagpanarbaho. (Uban sa taho sa DSWD-Davao Region)