PATAY ang magtiayong terorista nga giingong misukol sa mga awtoridad alas 2:15 sa hapon, Dominggo, Nobiyembre 27, 2022, didto sa Cotabato City.
Giila ang mga napatay nga sila si Aiman Mandi Ali, alyas "Aiman Ali" ug ang iyang asawa nga si Hairon Akmad Martin, mga molupyo sa Purok Pinnen, Barangay Rosary Heights 6, Cotabato City.
Matud ni Cotabato City Police Director Colonel Querubin Manalang, gironda sa hiniusang pwersa sa SK PDEU, SK PIU, PRO12, CTD PNP IG, RIU15 PNP IG, SWAT, 1st SKPMFC, CMFC, ug Police Station 2 ang balay sa mga suspek.
Sa pagsulod pa lang sa raiding team, gipusil sila sa magtiayon hinungdan nga mibalos ang mga awtoridad.
Daling gidala sa kapulisan ang magtiayon sa balay tambalanan apan nakabsan kini sa ilang kinabuhi human nakaangkon og daghang samad igo sa mga bala sa nagkadaiyang parte sa ilang kalawasan.
Narekober sa kapulisan gikan sa posisyon sa mga suspek ang usa ka kalibre .45 nga pistola ug mga kagamitan sa paggama og bomba.
Ang magtiayon nag-atubang og kasong may kalambigitan sa Comprehensive Dangerous Firearms and Ammunition Regulations Act (RA 10591) ug illegal gun running (RA 9516).
Si Abu Aiman nalambigit sab sa South Seas Bombing sa Cotabato City niadtong 2018 ug nalambigit usab sa mga aktibidad sa Daulah Islamiyah Abu Turaife ug Salahudin Hassan Group sa Central Mindanao diin labing bag-o nga gibombahan niini ang Yellow Bus Line sa Tacurong City.
Gironda sa kapulisan ang panimalay sa magtiayon pinasikad sa warrant of arrest nga gi-isyu sa Regional Trial Court, 12th Judicial Region, Branch 19, Isulan, Sultan Kudarat.
Sa pagkakaron, gipangita pa sa kapulisan ug militar ang laing mga suspek sa pagpamomba sa YBL sa Tacurong City.