GIKATAKDANG mag-abot sa Barangay 23-C, Isla Verde Davao City ang duha ka ginang ug ang bana nga nalambigit sa pagpangabit.
Subay sa impormasyon nga gipaabot sa Superbalita Davao gikan sa kasaligan nga impormante kinsa silingan sa gidumog nga Didang, nasayran nga giayo kini'g bira ug giguyod sa usa ka misis nga si Evelyn, dili niya tinuod nga pangalan, ang babaye nga giingong kabit sa bana.
Niadtong Dominggo, Nobyembre 27, 2022, sa Purok 3 sa Isla Verde, giingong misulong si Evelyn sa gipuy-an ni Edna (bansagon gitago) 45-anyos, dihang iyang nasayran nga kini diay ang kabit sa iyang bana.
Walay duha-duha nga mibira si Evelyn kang Edna dihang nahigayon sab nga si Edna nanghalay og sinina sa tugkaran.
Didto giayog bira ni Evelyn ug giguyod nga daw giayog lampaso sa tugkaran hinungdan nga nakaangkon kini og mga pangos sa kalawasan.
Ang bana nga si Roger, 59-anyos, nangulipas sa pasangil, apan si Edna miangkon nga naa sila'y relasyon uban sa pasalig nga ulitawong guwang kuno ang lalaki.
Dugang nasayran nga wala nahibalo si Edna sa kaagi ni Roger gumikan bag-o lamang kining nagpuyo sa dapit kinsa gikan sa Tandag City.
Gilayong nagpa-blotter si Edna sa hitabo, didto sa Sta. Ana Police Station, samtang si Evelyn nagpa-blotter sab.
Ang duha gimanduan sa kapulisan sa police station 1 nga mag-abot sila sa barangay level aron didto una sila husayon.