Nangayo og dakong budget si Mayor Michael Rama alang sa 2023 aron iyang makab-ot ang Singapore-like nga Cebu City sulod sa iyang termino. Dako kaayo nga gahin ang gipangayo kay niabot og P50 bilyunes.
Apan bugti usab niini mao ang pagpatuman sa hingpit sa umento sa mga buluhisan nga grabe sab kataas ang saka. Kon tinuod man, dunay buhis nga giingong moabot og 7K porsiyento ang umento.
Dunay mga negusyante nga nipalag tungod sa kadako ra sa umento. Ang nakaparat pa kay di makaabot sa P50 bilyunes ang makita sa Siyudad bisan pag ipatuman ang tanang mga umento sa mga buluhisan.
Maayo kaayo ang tumong sa mayor. Duna siyay maanindot nga panglantaw nga alang kaniya, bisan magkinaunsa ang iyang umaabot nga political career, iya kining buhaton.
Kon dali-dalion ang pagpatuman sa iyang damgo, bug-at kaayo ni nga palas-unon sa mga Sugboanon, negusyante man o ordinaryong lumolupyo.
Sama ra ni sa pagpas-an og usa ka sakong bugas. Kon tingbon ang P50 kilo, bug-at kaayo. Apan kon bahinon og kaduha, gaan ra ni.
Ingon ani usab unta ang pagpatuman ni Rama sa iyang damgo. Di paspasan ang pagpatuman nga sama og gitingob aron di makalitan ang mga Sugboanon ug mabug-atan sa mga buluhisan.
Mahimo ra man nga anam-anam ang pagpatuman niini, di diha-diha. Kay kon maayo lang ang pagka handle sa iyang political career, sama sa ubang mga local chief executive nga social media savvy kaayo, molanat pa siya og siyam ka tuig nga mao say pagkapupos sa gitugot nga tulo ka termino.
Kining iyang pagdali-dali sa pagpatuman sa iyang panglantaw, dako kaayo ni nga babag ug makaguba sa iyang political career.
Pinaagi sa anam-anam o pinaagi sa phases, ang iyang panglantaw nga Singapore-like matuman ra. Di lang dali-dalion kay posibleng makaapekto ni sa iyang political career.