Usa ka menor de edad nga nahubog ug nag-wild sa night market sa dalan Colon sa dakbayan sa Sugbo sa Dominggo, Nobiyembre 27, 2022, nakuhaan og 13 ka pakete sa gituohang shabu nga mobalor og P13,000.
Matud ni Police Major Efren Diaz, hepe sa Parian Police Station 1, nakadawat sila og report gikan sa mga barangay tanod nga nagbantay sa night market sa Colon nga dunay batan-on kauban sa laing grupo sa mga menor de edad ang nagginukdanay.
Giingong duna kini gipangita nga tawo nga birahan unta niini apan napakgang sa mga tanod nga maoy hinungdan nga gidakop siya ug gidala sa police station.
Sa pagsusi pa sa mga pulis, nakuha ang mga pinakete sa gituohang shabu sa iyang bulsa.
Duna siyay gitug-an kon asa niya kuhaon ang illegal nga drugas apan sa gihimong follow-up operation nagnegatibo kini.
Giingong dunay grupo ang maong batan-on diha sa downtown area nga responsabli sa kagubot tungod sa bangi sa laing grupo.
Si Police Colonel Ireneo Dalogdog, hepe sa Cebu City Police Office (CCPO), nagkanayon nga tungod sa pangangkon sa batan-on nga nagpangedaron pa siyag 14, paabuton pa nila ang ginikanan niini kon makapakita sila sa birth certificate nga tinuod ang gitug-an niini nga edad.
Kon mamatud-an nga 14 anyos kini walay kaso nga ipasaka ang kapulisan apan ila kining iduso ngadto sa Cebu City Social Welfare and Services alang sa intervention nga himuon sanglit dunay drugas nga nakuha gikan sa iyang posisyon. (AYB)