Ang Lapu-Lapu City Government niila sa 43 ka designated community fireworks display (CFD) areas sa dakbayan atol sa Pasko.
Ang mga lugar naglakip sa Barangay Agus, Suba-Basbas, Babag, Calawisan, Gun-ob, Looc, Poblacion, Bankal, ug Buaya.
“Ang atoa man gud mas maayo nga mag-set ta og guidelines. Bahala na sila og mohimo sila sa ilahang tugkaran, di man gyud nato ma-control na siya,” matud ni Lapu-Lapu City Police Office (LCPO) Director Elmer Lim.
Gipasiugda ni Lim nga ang mga indibidwal nga mopili sa paglapas sa mga panudlo mag-antus sa mga sangputanan, ug midugang nga sila ubos sa regulasyon sa gobiyerno.
Ang city director niingon nga adunay mga police personnel nga mohimo og roving o monitoring sa nahisgutang mga lugar, dugang pa nga ila usab nga i-tap ang barangay ug uban pang force multipliers.
Gawas niini, ang firecrackers ug pyrotechnics authorized ug designated zones anaa ra sa daplin sa karsada gikan sa Corner Kinalumsan, Barangay Canjulao, agi sa crossing sa Barangay Calawisan paingon sa Tacan, Barangay Babag lakip na sa Sitio Road.
Ang pagbaligya sa maong mga produkto gawas sa gitakda nga retailing zone maisip nga ilegal o walay retailers permit.
Si Lim niingon nga ang kagamhanan sa dakbayan kasagaran mohatag og permit sa mga retailer nga makabaligya sa Disyembre 15.
Ang laing inspeksyon gilauman nga masiguro nga ang mga giya nga gitakda sa LGU, lakip ang mga lugar sa paggama, gipatuman.
Ang LCPO, uban sa ubang ahensya nga hingtungdan, nipahigayon og inspeksyon sa tulo ka firecracker ug pyrotechnics manufacturers sa Barangay Babag niadtong Biyernes, Nobyembre 25.
Matud pa ni Lim nga kini aron masiguro ang lebel sa pagtuman sa manufacturer sa mga lagda ug guidelines nga gilatid sa kapolisan aron malikayan ang disgrasya sa mga pabuto ug manufacturing sites ug malikayan ang pagkaangol sa mga trabahante. (MKG)