Aprubado na ang P20.15 bilyunes nga proposed budget sa executive department sa Probinsya sa Sugbo alang sa tuig 2023.

Kini maoy gikompirmar ni Bokal Glenn Anthony Soco sa sixto distrito atol sa regular session sa Hunta Probinsyal sa Lunes, Nobiyembre 28, 2022.

“Walay amendments nga gihimo for the budget 2023 nga giaprubahan ganina for second reading and then subsequently giaprubahan pod siya for third and final reading. Wala may concerns walay questions kanamo sa Hunta Probinsyal kay nagpahigayon man sad ta og budget deliberations and we trust the executive department as well sa ilang pag formulate sa continuity sa programs, plans and projects sa atong governor nga nakita nato sa pipila ka tuig sa administration kuyog ni Governor Gwen nga naa gyu’y mga kausaban nga nakita,” matud ni Soco sa Nobiyembre 28, 2022.

Naapil na sa P20.15 billion nga budget sa Kapitolyo sunod tuig ang annual investment plan nga P10 bilyunes nga unang giaprobahan sa Provincial Development Council (PDC).

Sa maong pundo, gigahinan sa Kapitolyo og P2.1 bilyunes ang general public services; P8.7 bilyunes niini ang social services ug P9.2 bilyunes o 45.98% ang gitagana alang sa economic services.

Mas dako ang maong pundo kon itandi sa P18.3 bilyunes nga pundo karong tuiga.

Una nang gipahibaw ni Cebu Governor Gwendolyn Garcia nga sama sa miaging tuig nga annual budget sa Probinsya sa Sugbo, mobubo og dugang budget ang Kapitolyo alang sa mga proyekto sa imprastraktura ug health services sa Probinsya sa Sugbo.

Kini aron mapadayon angpagkonkreto sa mga road networks, water system development ug pagpalambo sa mga hospital o private health services.

Ang giduso nga pundo sa tuig 2023 sa Probinsya sa Sugbo gikatakda nga pirmahan na ni Garcia isip pagsilyo niini nga balaod.