Mga biktima sa sunog sa Sitio Paradise sa Barangay Looc, dakbayan sa Mandaue sa miaging Martes, Nobiyembre 22, 2022, hayan mabalhin sa ‘transitory housing’ nga giplanohan sa kagamhanan sa dakbayan sa upat ka ektarya nga luna atubangan sa Cebu International Convention Center (CICC).

Atol sa regular session sa Sangguniang Panlungsod sa Lunes, Nobiyembre 28, 2022, si manlalaban John Eddu Ibañez, executive secretary ni Mayor Jonas Cortes, niingon nga ang pribadong kompaniya nga nag-abang sa prime lot nga gipanag-iya sa Siyudad nitugot sa Siyudad sa paggamit sa maong lugar.

Hinuon, si Ibańez niingon nga wala silay laing kabutangan nga makatagana sa kapin sa 700 ka apektadong pamilya gikan sa Barangay Looc ug mga 500 ka pamilya nga kasamtangang nagpuyo sa CICC.

“That is only transitory. Ibutang sila diha in preparation sa atoang 14,000 units nga socialized housing,” matud ni Ibañez, nga mahimutang sa Sitio Maharlika sa Barangay Tipolo. (MKG)