Nipasidaan ang Cebu City Transportation Office (CCTO) sa mga motorista sa grabeng trapiko sa Cebu South Coastal Road (CSCR) human gatusan ka libo ka mga magtutuo ang gipaabot nga magtapok sa South Road Properties (SRP) sa Miyerkules, Nobiyembre 30, 2022, alang sa “Selebrasyon sa Paghari ni Jesus.”

Ang organizers sa relihiyusong kalihokan niingon sa SunStar Cebu sa Lunes, Nobiyembre 28, nga sila naglaum nga kapin sa 200,000 ka mga tawo ang magtapok sa venue tungod sa duha ka tuig nga pahulay nga dala sa pandemya.

Isip kabahin sa ilang core values, ang organizers nga nangayo og anonymity, niingon nga ang mga partisipante sa kalihukan magagikan sa naglainlaing lungsod ug dakbayan sa Sugbo.

“Ang tinuig nga pista giorganisar aron sa pagpasidungog kang Jesus nga Nazaretnon ug pagmantala nga si Jesus naghari sa tanang kanasuran. Kini gihimo aron sa pagbayaw ug pagsimba sa ngalan ni Jesus,” sumala sa organizers.

Ang ulahing pagpahigayon niini niadtong 2019, ang kalihokan nagtigom og labing menos 200,000 ka mga tawo ug karong tuiga, ang organizers nagpaabot sa dakong tumatambong alang sa maluho nga selebrasyon sa pagsimba.

Isip lakang nga makatabang sa pagpaluag sa lihok sa mga sakyanan, ang CCTO mopakatap og kapin sa 80 ka personnel sa CSCR nga dugangan usab sa volunteer marshals.

Si CCTO Traffic Aide III Jounald Bautista niingon nga walay mga karsada sa CSCR nga sirad-an atol sa kalihukan apan kinahanglang mogamit ang mga motorista og alternatibong rota aron malikayan ang posibleng grabeng trapiko. (IRT)