NADAKPAN na sa Parian Police Station 1 sa Dominggo sa hapon, Nobiyembre 27, 2022, ang "responsabli sa pagkawat" sa mga Christmas decor ug tarpaulin nga gimuntar sa kagamhanan sa dakbayan sa Sugbo sa center island sa Osmeña boulevard nga alang unta sa programa ni Cebu City Mayor Michael Rama nga ‘Christmas City.’

Matud ni Police Colonel Ireneo Dalogdog, hepe sa Cebu City Police Office (CCPO), nakuha sa suspek ang tarpaulin nga kinawat nga mobalor og P4,000.

Kini usab ang suspek sa paggisigisi sa Christmas greetings ni Mayor Rama sa Osmeña Boulevard.

Duha ka buwan ang nakalabay, nadakpan na usab kini sa kapulisan sa kasong pagpanulis ug pagpangawat lakip na ang pagpanguha og mga cable sa telepono sa area sa Abellana Police Station sa Cebu City Police Office (CCPO).

Matud ni Police Major Efren Diaz, hepe sa Parian Police Station, dili lang una nila nganlan ang suspek tungod kay duna pa silay follow-up operation.

Apan gibutyag niini nga nailhan na nila ang laing duha ka mga kauban sa suspek nga pulos mga batan-on nga mao ang nagtambayayong nga makuha ang tarpaulin lakip na ang Christmas lights sa Osmeña Boulevard atubangan sa Cebu Normal University.

Gibaligya, matud pa sa mga suspek, ang tarpaulin sa Carbon public market aron itabon sa mga utanon nga baligya sa barato kaayo nga presyo.

Mao na kini ang pangita sa mga suspek nga nanguha sa mga tarpaulin nga gipangbitay diha sa karsada lakip na ang Christmas lights.

“Ilang ning ibaligya sa Carbon sa tag P250-200 para pang cover sa nga prutas nga namaligya sa Carbon,” matud ni Diaz.

Patutokan ni Dalogdog sa iyang mga sakop ang pagbantay sa mga dayan-dayan sa Pasko nga gipamutang sa center island ug sa mga sky walk palibot sa dakbayan.

Giawhag usab sa kapulisan ang publiko sa pagbantay sa mga dayan-dayan sa kadalanan. (AYB)