Patay ang kanhi piniriso human gipusil sa iyang kapuyo, alas 5:45 sa hapon sa Dominggo sa Sitio Balhaan, Barangay Madridejos, lungsod sa Alegria.

Si Neil Leproso, 41, mananagat ug kanhi person deprived of liberty (PDL) sa Cebu Provincial Detention and Rehabilitation Center (CPDRC), nakaangkon og samad pinusilan sa iyang ulo.

Wala pa igkita ang suspek nga kapuyo nga si Niña Dagoc, hingkod, kinsa nisibat human sa krimen.

Si Police Lt. Alexus Tangub, hepe sa Alegria Police Station nga nahinabi sa Superbalita Cebu, nagkanayon nga ang kabanay ug pag-umangkon nakadungog sa biktima ug suspek nga naglalis sa wala pa mahitabo ang krimen.

Si Tangub nagkanayon nga ang biktima nag-inom nianang hapon uban sa iyang kabanay ug nakabantay nga kalit nagkalalis ang duha sa wala matino nga hinungdan.

“Kanunay naman daw ni sila maglalis, unya dagko kaayog mga tingog. Kalit lang dunay buto-buto katulo, sa pagsusi nila (kabanay), nagbuy-od ang biktima nagkadugo ang ulo,” dugang ni Tangub.

Katapusang nakit-an sa kabanay ang suspek nga naglakaw padulong sa karsada nga pito ka metros ang gilay-on gikan sa ilang panimalay.

Ang suspek nisakay sa wala matinong motorsiklo. Wala sab maestablisar sa kapulisan kon nagpaabot ba sa suspek ang nagmotorsiklo.

Dugang nasayran ni Tangub nga ang suspek magduawan lang sa iyang kapuyo nga biktima.

Ang biktima gikatahong nakagawas sa CPDRC niadtong Mayo 24, 2022 gumikan sa kasong illegal possession of firearm.

Unya dihang nakagawas, nagpadayon sa pagpanagat ug nagpuyo uban sa suspek.

Apan wala masuta sa kabanay kon taga asa sa Sugbo ang kagikan sa babaye. Pero gikatahong taga Davao kini nga gikaila sa biktima dihang napriso.

Sumala ni Tangub, ang armas sa biktima gigamit sa krimen apan gidala sa suspek human wala na kini makita.

Narekuber sa crime scene mao ang tulo ka kabhang sa kalibre.45 nga armas.

Wala nila isalikway nga nailog sa suspek ang armas kay nakainom kini hinungdan nga gipusil sa makatulo ka higayon, apan usa ra ka bala ang niigo sa ulo sa biktima.

Samtang, ang tanang anggulo gisubay sab sa kapulisan kon unsay gilalisan.

Nagpadayon ang ilang manhunt operation batok sa suspek.