ATO na nga nabasahan sa mga mantalaan ug nadunggan sa radyo ug TV ang balita kabahin sa strikto nga pagpatuman sa MMDA (Metro Manila Development Authority) sa lagda sa trapiko ug kalimpyo sa mga sidewalk sa Metro Manila kon National Capital Region (NCR) sama sa mga motorsiklo nga mosugat sa one-way o di ba anha moagi sa sidewalk, nga nakahasol sa uban nga motorista ug mga tawo nga naglakaw lang.

Kanang mga motorista nga di motuman sa mga lagda sa trapiko kadaghanan nila "habal-habal" nga mosugat lang sa one-way lane sa kadalanan ug ang uban anha moagi sa sidewalk. Di man lang problema ni sa MMDA kay naa sad ta diri sa Sugbo labina sa mga dapit sa dakbayan nga walay taffic enforcer nga nagpatikawtikaw.

Ang atong mayor sa dakbayan sa Sugbo, Halangdon Mike Rama, nangandoy ug naninguha nga maawat ang kalimpyo ug kahapsay sa Singapore dinhi sa atong dakbayan sa Sugbo. Gani, na isyu ang gipangayo sa mayor nga P50 bilyones nga badyet sa tuig 2023 alang sa matud pa Singapore-like project. Unya, aron makab-ot ang maong P50 bilyones nga badyet pasakaan sa dakbayan ang buhis sa yuta ug uban pa.

Apan akong nakita nga ang pagpanindot sa dakbayan wa man nagkinhanglan og dako nga pundo aron maipatuman ang giingon nga Singapore-like city. Ang primero nga gikinahanglan, alang kanako, mao ang pagdisiplina sa katawhan. Usa sa mga hinungdan nganong hugaw ang atong dakbayan ug gubot ang dagan sa trapiko tungod kay mas daghan ang badlongon kay sa mga motuman sa balaod.

Bisan og pila pa ka bilyon ang badyet sa dakbayan sa Sugbo, ingon man sa uban dakbayan dinhi sa probinsya sa Sugbo, alang sa pagpanindot sa dakbayan kon ang mga tawo wala gihapoy disiplina, usik ra ang kwarta nga gikan sa buhis sa katawhan. Kon wa ko masayop, ang giuna og imponer ni anhing Singapore Prime Minister Lee Kwan Yew mao ang pagdisiplina sa katawhan lakip na ang mga turista.

Gani, na isyu sa human rights sa Lee Kwan Yew tungod sa pamaagi sa pagpatuman sa ilang balaod nga pakauwawan sa publiko ug latuson pa gani ang maghugaw-hugaw sa kadalanan sa Singapore ug sa uban nga salaod. Mahimo kaha ni Mayor Mike ang strikto nga pagpatuman sa ordinansa sa dakbayan ingon man nasudnon nga balaod?

Daghan mga motorista nga sugaton lang ang one-way lane o dalan basta walay makit-an nga traffic enforcer. Kon naa man gani traffic enforcer apan nagtalikod lang. Di lang usa ka salaod ang pagsupak sa lagda trapiko sama sa sugaton lang sa usa ka motorista ang one-way nga dalan, apan duol pa gyud sila sa disgrasya. Law-ay sad tan-awon nga dunay mga motorista sayonsayonon ra nga sugaton ang dagan trapiko, nga morag sila ang tag-iya sa dalan. Ang nakaparat pa gyud kay masuko kon babdlongon.

Ang pangutana sa atong mga halangdon nga opisyales sa mga dakbayan ug lungsod, labina sa dakbayan sa Sugbo, kanus-a man gyud ninyo nga strikto nga ipatuman ang city ordinances ug balaod sa trapiko aron pagdisiplina sa katawhan?