KASONG direct assault ang atubangon sa usa ka 64-anyos nga lalaki human kini nanumbag og pulis.
Ang insidente nahitabo alas 9 sa gabii, Nobyembre 28, 2022 sa usa ka resto bar sa Corner Tiongko ug V. Mapa Street, Barangay 10-A Poblacion, Davao City.
Giila ang suspek nga si Justino (bansagon gitago) nga taga Bacaca, Barangay 19-B, Davao City.
Sa report sa San Pedro Police Station 2, nasayran nga miresponde ang duha ka mga pulis nga sila Patrolman Axcel Erine ug Patrolman Mitz Harvy Sevilla human nangayo og tabang kanila ang cashier sa resto bar.
Kini gumikan sa pagka-arogante sa usa sa ilang mga kustomer nga nakapaalarma sa ubang kustomer sa maong establisemento.
Giisyuhan usab siya og citation ticket sa kalapasan sa City Ordinance 0367-12 series of 2012 kun Anti-Smoking Ordinance of Davao City.
Sumala ni Police Major Marvin Hugos, ang station commander sa San Pedro Police Station 2, nga giingong lango sa ilimnong makahubog ang suspek.
Nasayran nga sa dihang giduol sa pulis ang suspek, nagdagkot pa kini og sigarilyo atubangan sa pulis human gisita ug gisumbag niini si Patrolman Erine sa nawong.
Ning kasamtangan, gibalhog sa selda sa police station ang suspek kinsa naghuwat sa pag-asikaso sa iyang mga papeles sa pagpiyansa alang sa temporaryo niining kagawasan.