ARON nga mapabilin ang pagkunhod sa illegal nga drugas sa Davao Region, gipangsunog sa Philippine Drug Enforcement Agency (PDEA) Davao ang mga ebidensiya nga ilang nasakmit atol sa ilang mga lehetimong operasyon.
Kauban ang Philippine National Police (PNP), gipangdauban ang mga druga nga gikan sa mga nagkalain-laing operasyon sa Davao Region.
Ang pagsunog gihimo niadtong Nobyembre 26 alas 9 sa buntag sa Wood Haven Crematorium sa Barangay La Filipina, Tagum City, Davao del Norte.
Sa impormasyon gikan sa PDEA-Davao, ang aktibidad gipangunahan mismo nila ni PDEA-Davao Director Aileen Lovitos, Police Colonel Thor Valiente Cuyos, ang deputy regional director for Operation sa PRO-Davao nga maoy representante ni Regional Director Police Brigadier General Benjamin Silo Jr.
Gipangsunog ang 514.0331 gramos sa shabu nga mokantidad og P7,196,463.4 ug 7,637.0130 gramos sa marijuana nga dunay kantidad nga P916,441.56 diin ang tanan, mokantidad sa P8,112,904.96.
Nahimong saksi sa gihimong destruction sila si Governor Edwin Jubahib, Provincial Governor sa Davao del Norte; P/Col Antonio Alberio Jr., ang Provincial Director sa Davao del Norte Police Provincial Office; Prosecutor Virginio C Juan II, Atty. Janess A Blanco-Manipes, ang Chief sa Public Attorney’s Office sa Davao del Norte; Teresita R Machete, RN, Chapter Administrator sa Philippine National Red Cross ug sa mga partner agencies.