3 Cafgu patay sa pagpanulong

GRUPO sa Bangsamoro Islamic Freedom Fighters (BIFF) ang gitudlo nga suspek sa pagsulong sa outpost sa mga miyembro sa Cafgu Active Auxiliary (CAA) alas 3 a.m., Martes, Nobyembro 29, 2022, sa probinsiya sa Maguindanao del Norte.

Giila ang mga napatay nga sila si Christian Silvestre, Ignacio Lozad ug Dondon Ahito. Samtang naangol sa sila Arnel Cayanan ug Calbertson Baggay nga pulos sakop sa CAA ubos sa 6th Infantry (Kampilan) Division sa Philippine Army.

Matud ni Maguindanao Provincial Police Office Director Colonel Noel Sermese nga ang lima ka CAA nagbantay sa giayo nga taytayan sa Barangay Edcor, Buldon sa nahisgutang probinsiya.

Apan kalit lang giatake sa mga armadong mga lalaki kinsa ulahing gitumbok nga mga miyembro sa BIFF, hinungdan nga nahitabo ang bahug-bahog nga milungtad sa pipila ka minutos.

Apan tulo ka CAA napatay samtang mga armado miikyas gilayon human nakamatikod nga nagresponde na ang mga sakop sa 5th Marine Battalion Landing Team.

Sa wala pa misibat ang mga misulong, gikuha pa nila ang upat ka M14 rifles nga giisyu sa mga CAA.

Ang maong hitabo gikondena ni 6th ID Chief ug Joint Task Force Central Commander Major General Roy Galido.

Gilutos na sa MBLT-5, uban ang mga CAA ang mga armadong grupo.