Ilog sa no. 3

Ilog sa no. 3

Mga duwa karon: Nov 30, 2022

3:00 pm- Meralco batok NLEX

5:45 pm- Ginebra batok Converge


Ilugan sa Brgy. Ginebra Gin Kings ug Converge FiberXers ang No. 3 nga puwesto sa ilang panagharong sa main game karong hapon, Nobiyembre 30, 2022 (PH time) sa Philippine Basketball Association (PBA) Commissioner’s Cup sa Philsports Arena.

Ang duha ka mga kampo, nga parehong mosagubang sa katapusan nilang tahas sa elimination round, kasamtangang nagbahin sa ikatulong luna nga pulos adunay 8-3 nga rekord sunod sa league leader Bay Area Dragons (10-2) ug Magnolia Chicken Timplados Hotshots (9-2).

Mas mahinungdanon alang sa Gin Kings nga modaog batok sa FiberXers tungod kay aduna pa sila’y purohan nga makalusot sa No. 2, nga nagtangag og twice-to-beat nga bintaha sa quarter-finals.

Mahitabo kini kon modaog ang Gin Kings karon unya mapilde ang Hotshots sa katapusan niining tahas batok sa Rain or Shine Elasto Painters karong Biyernes, Disyembre 2, 2022.

Kon magtabla ang Gin Kings ug Hotshots sa 9-3, hayan ang Gin Kings maoy makaangkon sa No. 2 tungod kay ilaha mang nabuntog ang Hotshots, 103-97, niadtong Oktubre 23.

Kon buot huna-hunaon, dili na tantong mahinungdanon alang sa FiberXers nga modaog ning sangkaa gumikan kay natanggong na man silang daan sa No. 3 o No. 4 nga puwesto.

Apan labing seguro, paningkamutan gihapon sa FiberXers nga modaog aron makabawon sila og dugang kadasig sa quarter-finals.

Sa premirong duwa, magsangka ang parehong delikado nga manamilit nga mao ang NLEX Road Warriors ug Meralco Bolts.

Ang Bolts nagbitay sa ikasiyam dala ang 4-6 nga rekord samtang anaa sa ika-10 ang Road Warriors nga adunay 4-7 nga baraha.

Ang mapilde mahutdan na og purohan nga makasud sa quarter-finals.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph