Shabu gisunog

    GI-CREMATE: Mokabat sa kapin sa P256 milyunes nga kantidad sa nagkadaiyang matang sa illegal drugs ang gisunog sa thermal facility sa funeral homes sa dakbayan sa Sugbo. / Arnold Y. Bustamante
GI-CREMATE: Mokabat sa kapin sa P256 milyunes nga kantidad sa nagkadaiyang matang sa illegal drugs ang gisunog sa thermal facility sa funeral homes sa dakbayan sa Sugbo. / Arnold Y. Bustamante



Dul-an sa 37 ka kilong shabu ug ubang matang sa ginadiling drugas nga nasakmit sa kapulisan ug Philippine Drug Enforcement 7 nga mobalor ngadto sa kapin sa P256 milyunes ang gisunog sa Martes, Nobiyembre 29, pinaagi sa thermal facility sa Cosmopolitan Funeral Homes sa dalan Junquera, dakbayan sa Sugbo.

Sa wala pa kini hingpit gisunog, gipakita una sa mga sakop sa media ug ubang mga saksi ang 36.9 ka kilo nga shabu ug laing matang sa illegal nga drugas sama sa marijuana ug ecstasy.

Ang mga chemist personnel nisusi pinaagi sa pagkuha og sample aron isiguro nga wala sila magtumo-tumo sa publiko labot sa ilang gihimo.

Matod ni PDEA-7 Director Levi Ortiz nga kini na ang ika-siyam nga pagguba sa mga ebidensya nga adunay kamandoan sa korte diin gitaral ang mga kaso ug kinahanglan nang sunugon.

“Mao ni siya ang pinakadaghan nga drugs nga atong gi-destroy around 256 million pesos, and for the information of everybody, ang 36 kilos ani is from the PNP,” matod ni Ortiz.

Sa data nga gihatag sa PDEA 7, ang P251.2 million mao ang balor sa shabu nga nasakmit sa kapulisan sa dakbayan sa Lapu-Lapu; P44,722 alang sa marijuana ug ecstasy nga mokantidad og P5 milyunes.

Gipahibawo sa chemist sa PDEA nga dili lang magpaila ug sa PNP Regional Forensic Unit 7 nga duna pa silay tag 50 ka kilo nga shabu sa ilang custody nga nagpadayon pa ang pagtaral sa korte nga wala pay kamandoan nga sunugon.

Gipasalig ni Police Colonel April Madroño, hepe sa PNP Regional Forensic Unit 7 nga ang gibana-bana nga 50 ka kilo nga shabu sa ilang pasilidad dili ma-recycle gumikan kay nakasilyo ug dunay tulo ka yawe nga gihuptan sa tulo ka PNP officers, usa na siya niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph