Gisupak sa kanhi mga opisyal sa Cebu City Government ang giduso nga 2022 Revised Omnibus Revenue Code of the City of Cebu nga kasamtangan karon nga pending sa Cebu City Council, Nobiyembre 29, 2022.
Si kanhi mayoral candidate ug kanhi Cebu City councilor Dave Tumulak nagkanayon nga dili pa haom ang pagpaumento sa buhis sanglit tanan apektado sa epekto sa Covid-19 nga nagdala og pandemya.
“Common sense ra man unta. Wala pa gani ta kabangon sa ekonomiya, pun-an pagduot sa kalisod (ang) mga tawo,” padayag ni Tumulak.
Sa iyang bahin, si former Cebu City Administrator Floro Casas Jr. niingon nga angay unta nga gitimbangtimbang og maayo sa Office of the Mayor sa wala pa nila giduso ngadto sa Konseho.
“Dapat unta gihuna-huna og tarong sa executive department ang epekto sa real property tax increase sa mga Cebuanos before nila gi-submit sa Konseho for approval. No doubt, excessive ni nga umento,” padayag ni Casas.
Sila si Casas ug Tumulak parehong nigamit sa proposed real property tax sa 500 square meter nga property sa Paseo Luis, Maria Luisa sa Barangay Banilad nga adunay P2 million nga market value sa 2006 ug adunay P1,200 nga tax due matag tuig.
Apan sa 2022, ang iyang market value nahimo nang P15 million ug ang tax due mahimo nang P90,000 kun 7400% increase para sa residential.
Sa commercial establishment, ilang gihimo nga sanglitanan ang 1,000 square meter nga property sa IT Park sa Barangay Apas nga kanhi adunay P4 million nga market value sa 2006 ug adunay P12,000 nga tax due matag tuig apan sa 2022, nahimo nang P150 million ug ang tax due niabot na og P2.25 million.
“Og madayon pagpasar sa City Council ang 2023 Budget Ordinance, labi na ang Realty Tax increase, apektado pud ang mga nag-abang sa yuta ug balay, apil na mga negusyante kay naay rason sila nga mo-increase pud, adto ipatong sa konsumidor,” pagpasabot ni Tumulak.
“Okay ra og mo-increase pero ayaw lang pud intawn ingon ani kadako. No to excessive Realty Tax increase,” dugang sa kanhi mayoral candidate.
Si Konsehal Noel Wendeslao, chairman sa budget and finance sa City Council, kinsa maoy niduso sa 2022 Revised Omnibus Revenue Code of the City of Cebu, nagkanayon nga posible nga mopiyait niini ang mga negusyante gumikan sa kadako sa increase partikular na sa pipila nga unang nahisgutan.
Si Konsehal Rey Gealon, atol sa usa ka deliberation sa pag-usbaw sa market value ug sa buhisanan sa real properties, nipadayag nga sa maong proposed revision, adunay posibilidad nga ang mga nanag-iya og yuta nga dili na makabayad sa buhis mahimong squatter sa ilang kaugalingon propiedad.
Sila si Konsehal Franklyn Ong, Nestor Archival, Mary Ann delos Santos ug Jerry Guardo nipadangat usab sa samang kabalaka alang sa katawhan sa siyudad sa Sugbo.
